И сеферда чи ихтилат биологиядин илимрин доктор, профессор, Нью-Йоркдин тIебии илимрин академиядин академик, РФ-дин алишверишдинни промышленный палатадин биологиядинни промышленностдин рекьяй комитетдин член, ГосНИИ-дин биологиядин активный затIарин лабораториядин заведующий, Москвада кардик квай “Гуьрчегвал ва сагъламвал” ООО-дин генеральный директор Авчиева Пенкер Бабаевнадикай я.
Ам 1955-йисуз Сулейман-Стальский райондин Кьулан СтIалдал гзаф аялар авай хизанда дидедиз хьана. 10-классда кIелзавайла, Пенкеран буба рагьметдиз фена. Вири четинвилеризни дурум гана, дидеди кIуьд аял кIвачел акьалдарна.
Акьалтай азиятризни магьрумвилериз килиг тавуна, веледри агалкьунралди юкьван мектеб куьтягьна, абур уьлкведин жуьреба-жуьре вузрикни экечIна. Хизанда вад лагьай велед тир Пенкера 1973-йисуз ДГУ-дин биологиядин факультет хкяна. Эвленмиш хьайидалай кьулухъ (1975-йисуз) кьисметди ам Москвадиз акъудна. Биологиядин рекьяй еке чирвилер авайвиляй, вичин алакьунрал муаллимарни гьейранаруналди, адалай 3-4-курсарин материал са йисан къене акьалтIариз алакьна. Гуьгъуьнлай ада кIелун заочнидаказ давамар хъувуна.
СССР чкIайдалай кьулухъ, уьмуьрдин вири хилера муракаб гьалар арадал атайла, гзаф кьадар пешекарарни алимар мажибар амукь тавурвиляй, къецепатан уьлквейриз финин ва я кIвалахдин къайда дегишарунин фикирдал атана. Пенкер Авчиевади Россиядин меркезда биологиядин активный затIарин лаборатория кардик кутуна. Нетижада Россиядин базарра дуьньяда машгьур фармацевтикадин цIийи жуьредин затIар, дарманар сифте яз пайда хьана. Лезги алимди регьбервал гузвай лаборатория государстводин илимринни ахтармишунрин институтдин илимдин подразделенийрикай сад я.
Лабораторияда арадал гъизвай затIариз дуьньядин алимри еке къимет ганва. Абурухъ пис азаррин вилик пад кьунин, операция авурдалай кьулухъ инсандин бедендиз къуват хтунин карда еке метлеб ава.
Илимдин рекье адан кIвалах алай аямдин медицинадин ва косметологиядин агалкьунрал бинеламиш хьанва.
Пенкер Бабаевнади илимдин рекье къазанмишнавай агалкьунрикай дуьньядин гзаф изданийра чапнава.
30 йисалайни гзаф девирда илимдин рекье кIвалахзавай алим здравоохраненидик зурба пай кутунай “Пеше — Уьмуьр” IV международный премиядин лауреат хьана. Ам къизилдин медалрин ва маса чIехи наградайрин сагьиб я. Накьв нафтIадикай михьунин рекьяй лап хъсан экологиядин технологиядай ам Газпромдин премиядалди къейдна. Адан къелемдикай 100-лайни гзаф илимдин макъалаяр, монографияр хкатнава.
Пенкер Авчиевади биологиядин илимрин кандидатвилин диссертация 1987-йисуз, докторвилин диссертация 1997-йисуз хвена. Къуй адахъ мадни зурба агалкьунар хьурай!
Куругъли Ферзалиев
