Са шумуд югъ вилик райондин культурадин управленидин гуьзчивилик кваз Ахцегьа, А.Гъаниеван тIварунихъ галай ДЮСШ-дин майдандал спортдин милли жуьрейрай Яран сувариз талукьарнавай акъажунар кьиле фена. Ана Ахцегьрин, Хуьруьгрин, Луткунрин, Къурукаларин (гьайиф хьи, райондин амай хуьрерин командаяр авачир) хуьрерин командайри иштиракна. Къугъунрин кьилин судьявал Агъалар Асланова авуна.
ИкI, путар (32кг+32кг) кьве гъилелди хкажунай 1-чкадиз Радик Асаев (Ахцегь, 24 сеферда хкажна), 2-3-чкайриз Эльнур Наврузалиев (Луткун) ва Икрам Алимов (Хуьруьг), къван яргъаз гадарунай ахцегьвияр тир Сократ Муртазалиев, Камил Агъамугъланов ва Мегьамед Парпачев, талукь тирвал, 1,2,3-чкайриз лайихлу хьана.
Армрестлингдай 1-чка Эмир Крымова (Гъуьгъвез), 2 ва 3-чкаярни Мавлют Мугъулова (Ахцегь), Сократ Менафова (Хуьруьг), цIил чIугунай 1-чка Ахцегьрин 2-нумрадин ДЮСШ-дин жегьилри, 2-3-чкаяр лагьайтIа, А.Гъаниеван тIварунихъ галай ДЮСШ-дин ва Хуьруьгрин командайри кьуна. Акъажунра 1-2-3-чкайриз лайихлу хьайи спортсменриз райондин культурадин управленидин патай гьуьрметдин грамотаяр ва къиметлу пишкешар гана. 1, 2 ва 3-чкаяр кьур Ахцегьрин 1 ва 2-нумрайрин ДЮСШ-рин, Хуьруьгрин школадин командаяр, талукь тирвал, 1, 2 ва 3-дережайрин дипломриз лайихлу хьана.
Рагьидин Эминов
