Зайифвал яз гьисабна
Венесуэладин оппозициядин кьил Хуан Гуайдоди малумарайвал, вичин терефдар юлдашар дустагъда туни уьлкве идара авунин жигьетдай президент Николас Мадуродин зайифвал къалурзава. Адан гафар “Reuters” чешмеди раижна.
“Вахтуналди тир президент дустагъда тваз жезвач, гьавиляй абур адан къваларив гвайбурухъ къекъвезва”, — лагьана милли ассамблеядин спикер Х.Гуайдоди.
Мукьвара Венесуэладин махсус къуллугъри Гуайдодин штабдин начальник Роберто Марреро дустагъ авурдакай малумарнай. Вахтуналди вич гьукуматдин кьил яз гьисабзавай Гуайдоди къейд авурвал, вичин юлдаш авай чкадин гьакъиндай адаз са затIни малум туш. Садхьанвай Штатрин госсекретарди Каракасдиз Марреро тади гьалда азад хъувун буйругъна. Идалайни гъейри, ам дустагъда тунихъ галаз алакъалу ксар жавабдарвилиз чIугунин къурху гана. Идалай вилик Вашингтонди Венесуэладин регьбер сиясатдин жигьетдай оппозициядин терефдаррин геле къекъуьн тавун патал тагькимарнай.
Венесуэлада гьалар парламентдин спикер Гуайдоди вич вахтуналди президент яз малумарайдалай кьулухъ хци хьана.
Кьенятзава
Татарстандин Балтаси районда муаллимризни духтурриз кIвалахзавай чкайра хсуси техника электричестводик кутун, токдин чайданар ишлемишун къадагъа авунва. “Радио Азатлык” чешмеди хабар гузвайвал, талукь къарар исполкомдин регьбер А.Хайрутдинова акъудна.
Интернетда раижнавай документда къейднавайвал, гьар са идаради вацран къене электроэнергия харжунин талукь учет кардик кутун лазим я. Электричество кьенятунин мураддалди хсуси мобильный телефонар, смартфонар ва электрочайданар идарадин дараматда токдик кутун къадагъа я.
Чкадин мектебра ихьтин къадагъа эцигнавайдакай Балтаси райондин образованидин отделдин регьбер Алия Закиевади тестикьарна. Адан гафарай, вич гъавурдик кутунвайвал, ихьтин къарар кьенят авунихъ галаз ваъ, дараматда цIай кьунин хаталувилихъ галаз алакъалу я. Райисполкомдин пресс-къуллугъди алава хъувурвал, и къарар республикадин маса муниципалитетрани къуватда гьатнава.
Къарар тестикьарна
Украинадин президент П. Порошенкоди россиявийриз ва тешкилатриз талукь яз цIийи санкцияр кардик кутунин гьакъиндай уьлкведин милли хатасузвилин советдин (СНБО) къарар тестикьарна. Идан гьакъиндай гьукуматдин сайтдиз акъуднавай къарарда раижнава.
19-мартдин къарарда къейднавайвал, сергьят эцигунин серенжемар кьилдин 848 ва юридический 294 касдиз акси яз малумарнава. Абурун арада маса уьлквейрин ватандашарни ава.
СНБО-дин пресс-къуллугъди тестикьарайвал, санкцийрин сиягьдик Крымдин муьгъ эцигунин карда иштиракайбур, Донецкий, Луганский областра ва Крымдин сергьятра “тапан сечкияр” тешкилунал машгъул хьайибур, гьакIни 2018-йисан ноябрдиз Керчдин проливда арадал атай вакъиадин вахтунда Украинадин морякар ва военный катерар эглешарунихъ галаз алакъалу ксар гьатнава. Сиягьдик Россиядин Госдумадин са жерге депутатар, Федерациядин Советдин векиларни акатнава.
Къалмакъал
Украинадин МВД-дин кьил Арсен Авакова журналист Дмитрий Гордоназ интервью гайи чIавуз малумарна хьи, президент П. Порошенкоди МВД-дин къурулушдал гуьзчивал тухун лазим туш.
Адан гафарай, МВД-дин кьили, президентдиз табий тушиз, парламентдихъ галаз санал кIвалахун лазим я. Амма Порошенкоди МВД-дин къурулушдиз советско-украинский сиясатдин къайдада килигзава. Ихьтин себебралди къалмакъал арадал къвезва.
Авакова алава хъувурвал, Порошенкодиз вири крарал гуьзчивалдай гьевес ава, гьавиляй адаз уьлкведин кар алай хилера 100 процентдин гъавурда акьадай ксар хьана кIанзава. Амма и дуьшуьшда адаз кIандайвал хьанач.
Порошенкодин ва Авакован арада къалмакъал 2014-йисан 25-майдилай, Порошенко президентвиле хкягъайдалай кьулухъ, 2017-йисан зулуз малум хьана. Гьа са вахтунда 2017-йисан июндиз “Петр Порошенкодин блок” фракциядин патай Рададин депутат С. Лещенкоди къуватдалди гьукум кьунин гьазурвилер акунин карда МВД-дин кьилик тахсир кутунай.
Зарар гана
Сириядин Саклабия шегьердиз боевикри цIай гайидалай кьулухъ анин 21 агьали азарханадиз аватна. Идакай гьукуматдин “SANA” информагентстводи хабар гузва.
Сагъламвилиз зарар хьайи вирибурукай женгинин газди зегьерламишай лишанар малум хьанва. Чешмеди тестикьарзавайвал, террористри шегьердин терефдихъ са шумуд ракета ахъайна.
Январдиз малумарайвал, “Аджнад Аль-Кавказ”, “Джейш Аль-Изза” и “Исламское движение Восточного Туркестана” (абур Россияда къадагъа авунва) кIватIалрин боевикри пилот авачир аппаратрин куьмекдалди Сириядин са жерге вилаятрив гележегда химиядин гьужумар кьиле тухунин мураддалди 500 литр зегьерламишдай затIар агакьарна.
Алатай йисан апрелдиз Сириядин Дума шегьерда химиядин гьужум кьилиз акъудайдакай малумарнай. Бязи чешмейрин делилралди, а чIавуз ислягь агьалияр телеф хьана. Газдикди зегьерламиш хьайибур къутармишзавай духтуррин “Лацу каскаяр” тешкилатдин видеодин чIук инсанрин арада гегьеншдиз чкIанай. Зарар хьайибуруз медицинадин рекьяй куьмек гунилай гъейри, “Лацу каскаяр” тешкилатди Сирияда кьиле физвай вакъиаяр видеокамерадизни къачузва.
Гьазурайди — Куругъли Ферзалиев
