Дельфин акьван регьимлу гьайван я хьи, и жигьетдай дуьньядал адав садни гекъигиз жедач. Дельфинди инсанриз вичин регьим къалуруниз талукь риваятар гьеле къадим заманайрилай малум я. КицI инсандин дуст яз машгьур ятIани, адани инсандиз са чIавуз вичин туьнтвални аксивал къалур тавуна жедач. Инсанди аксивал авуртIани, дельфинди ажугъвал къалурдач, гьавиляй ам умун къилихрин, регьимлу гьайван яз машгьур я.
Дельфин нек хъвадай гьайванрик акатзава. Абурун 43 жуьре малум я: 38 жуьре гьуьлерани океанра яшамиш жезва, 5 — вацIара. Касатка виридалайни еке жуьре я. Яргъал мензилра авайла, сада-садахъ галаз рафтарвал хуьн патал абуру ажайиб сесер акъудзава. Абурун куьмекдалди вилик квай чкайрин хаталувал тайинариз алакьзава.
Итижлу делилрикай сад ам я хьи, дельфиндиз кьве хук ава: сад — недай суьрсет хуьн, муькуьди тIуьр затI иливарун патал.
Дельфиндин хам хъуьтуьлди, са куьлуь затI галукьайтIани, хер жедайди я. Амма хирер са куьруь вахтунда сагъ хъжеда. Эгер чеб авай чкайра недай затI жагъин тийиз хьайитIа, абур яргъариз куьч жеда. Дельфинрин уьмуьр юкьван гьисабдалди 17 йис кьван я, бязибур лагьайтIа, гьатта 50 йисуз кьван яшамиш жеда.
Къадим Грецияда къастуналди дельфин кьейидаз кьиникьин жаза гузвай. Грекри адаз “пак балугъ” лугьузвай.
Гьазурайди — Куругъли Ферзалиев
