Алай йисан алатнавай тамам кьве вацра Махачкъалада 18 йисал къведалди яшарин аялрихъ ва жаванрихъ галаз алакъалу 9 авария арадал атана. Нетижада 9 аялдиз хасаратвилер хьана…
Аялрихъ галаз алакъалу аварийрин кьадар тIимиларунин, аялриз хасаратвилер хьунин вилик пад кьунин макьсаддалди, гьакI рекьера гьерекатдин хатасузвал таъминарунин истемишунар кьилиз акъудун патални 24-мартдилай 8-апрелдалди “Дикъет це — аялар!” лишандик кваз аварийрин вилик пад кьуниз талукьарнавай серенжемдин сад лагьай пай кьиле физва.
ДПС-дин къуллугъчийри транспортдин такьатрин шоферри аялар санай масаниз тухунин жигьетдай истемишунрал, рекьин гьерекатдин йигинвилел ва рекьерилай элячIзавай ксариз рехъ гунин къайдайрал амал авуниз кьетIен фикир гуда. Россиядин УМВД-дин Махачкъалада авай ОГИБДД-дин къуллугъчийри аялар санай масаниз тухуниз талукь яз къайдайрал амал тавунин дуьшуьшар дуьздал акъудун патал рейдар кьиле тухуда.
ОГИБДД-дин къуллугъчийри вири шоферриз рекьин гьерекатдин къайдайрал амал авуниз, иллаки образованидин идарайрин патарив гвай чкайра дикъетлувал мадни артухаруниз эвер гузва.
Радик Гьафизов, Россиядин УМВД-дин Махачкъалада авай ГИБДД-дин пропагандадин отделдин инспектор, полициядин старший лейтенант
