И йикъара Ахцегь райондин хуьруьн майишатдин управленида (УСХ) лезги жинсинин хипер арадал хкунин месэлаяр веревирдна. Идакай «Лезги газетдиз» райондин администрациядин пресс-къуллугъди хабар гузва.

Хиперин и жинс Ахцегь райондин «Восход» СПК-да арадал хкидайвал я, и майишатда авай диде хипер асул гьисабдай гьа и жинсининбур я. Къейдзавайвал, и жинсинин хипер Кьиблепатан Дагъустандин дагълух шартIарихъ галаз хъсан кьазва. Лезги жинсинин хипер як еридинди яз гьисабзава.

И жинсинин хиперин сар векъиди я ва гзафни-гзаф ам халичаяр хурунин карда ишлемишзава. Чкадин и жинс алатай асирда халкьди яргъалди кьиле тухвай селекциядин рекьелди арадал гъана. Сифте яз и жинсинин хиперин кьетIенвилер 1912-йисуз Вирироссиядин хипехъанвилин выставкадал малумарнай.

Ахцегь райондин гьавадин ва чилин шартIарихъ къейднавай жинсинин хипер хуьдай мумкинвал ава.

«Лезги газет»