Россиядин ФНС-дин малуматдал асаслу яз, 2018-йисан нетижайрай республикадин балугъчийрин хилен карханайри РФ-дин сад авунвай бюджетдиз 85 миллион манатдин кьадарда налогрин пулар янава.
Дагъустандин тIебиатдин ресурсрин ва экологиядин министерствода къейд авурвал, алатай йисан и вахтунив гекъигайла, им саки вад сеферда гзаф я. Министерстводин делилралди, республикада эхиримжи йисара балугъчивилин хилез инвестицияр желб авун хкажунихъ элкъуьрнавай кIвалах кьиле тухузва, нетижада и хел вилик физва ва цIийи карханаяр арадал къвезва.
“Анжах 2018-йисуз балугъчивилин майишатда инвестицийрин 20-далай виниз проектар уьмуьрдиз кечирмишиз башламишнава. Шаз церин культурайрин продукция гьасилунин кьадар регион патал лап винизди хьана — 4175 тонн продукция гьасилна, республикадин балугъчивилин майишатри -7110 тонн балугъар кьуна. Им эхиримжи 11 йисан вахтунда виридалайни хъсан рекъем я. Са шумуд карханади и тереф патал желбнавай инвестицийрин кьадар 560 миллиондилай гзаф я”, — малумарна чешмеди.
Алава хъийин хьи, къенин юкъуз республикада балугъчивилин майишатдин комплексдин 165 кархана регистрация авунва.
Чи мухбир
