Индонезияди Дагъустандай лапагрин як маса къачуниз итиж ийизва, гьикI лагьайтIа, и як лап хъсан еридинди я. Идакай Россияда Индонезиядин посол Мугьамад Вагьид Суприядиди, республикадиз пуд йикъан вахтунда мугьман хьунин сергьятра аваз, ислен юкъуз журналистриз малумарна.
“Чи экономикаяр садавай масадан игьтияжар ацIуриз жедайбур, алакъалу жуьрединбур я ва, сифте нубатда, алишверишдин хилез чна иллаки итиж ийизва. Дагъустандихъ лап хъсан еридин лапагрин як ава ва чна и хиле алишверишдин алакъаяр тайинарунин, мумкинвилерикай менфят къачунин месэлаяр веревирдна, вучиз лагьайтIа, алай вахтунда Индонезияди и суьрсет виниз тир кьадарда аваз Австралиядивай ва США-дивай маса къачузва”, — лагьана посолди Дагъустандин Алишверишдинни промышленный палатадин руководстводихъ галаз хьайи гуьруьшдин нетижада.
Суприядиди алава хъувурвал, ада региондин Алишверишдинни промышленный палатадин векилриз алай йисан августдиз Москвада кьиле фин лазим тир Индонезиядин фестивалда, гьакIни октябрдиз хьана кIанзавай международный Trade Expo Indonesia выставкадин мярекатра иштиракун теклифна.
Идалай вилик хабар гайивал, 2018-йисан нетижайрин бинедаллаз, Дагъустанди къецепатан уьлквейриз маса гузвай лапагрин якIун кьадар 4,3 агъзур тонндив агакьнава, им 2017-йисан делилрив гекъигайла, тахминан 26 сеферда гзаф я. Республикадин хуьруьн майишатдин ва недай суьрсетдин министерстводи хабар гузвайвал, 2018-йисуз региондай къецепатан уьлквейриз лапагрин якIалай гъейри, маса жуьре якIар маса ганач.
«Лезги газет»
