Регионрин гьафтедин вахтунда РФ-дин Федеральный Собранидин Государстводин Думадин депутат Юрий Левицкий Дагъустан Республикадин Кьилин патав гвай Агъсакъалрин Советдин член, Дербент шегьердин собранидин депутат Николай Алчиевахъ ва шегьердин мэрдин заместитель Видади Зейналовахъ галаз Дагъустандин фадлай авай театррикай сад тир Лезгийрин СтIал Сулейманан тIварунихъ галай государстводин музыкадинни драмадин театрдиз фена.
Театрдин директор Динара Эминовадихъ галаз санал мугьманар дараматда къекъвена, залдиз, сегьнедиз, театрдин кIвалериз ва сегьнедин тадаракриз килигна, артистрихъ ва кIвалахзавай масабурухъ галаз суьгьбетарна.
Юрий Левицкийди театрдин коллективдиз культурадин работникрин Югъ мубаракна. Парламентарийди къейдна хьи, “Ватандин гъвечIи культурадин” партийный проект уьмуьрдиз кечирмишунин сергьятра аваз, “Сад тир Россия” партияди тереф хуьналди, 2017-2018-йисара материалринни техникадин база ва сегьнеяр патал Лезгийрин музыкадинни драмадин театрдиз 20 миллион манатдив агакьна пул чара авуна. Чи уьлкведа Театрдин йис яз малумарнавай цIи театрдиз 22 миллион манатдилай гзаф пул чара авун планламишнава. Парламентарийди работникрин зегьметдин шартIариз, абурун мажибриз, гьазурзавай сегьнейриз, гьакIни театрдал гьалтзавай четинвилериз итиж авуна.
Эхирдайни Юрий Левицкийди госмуздрамтеатрдин коллективдихъ яратмишунрин рекье цIийи агалкьунар хьана кIанзавайди лагьана.
Театрдин къуллугъчийрин тIварунихъай Динара Эминовади чпин кIвалахдиз фикир гунай мугьманриз сагърай лагьана.
Чи мухбир
