Мадагаскарда виридалайни машгьур тар баобаб-чайдан я. Адал ихьтин тIвар дуьшуьшдай акьалтнавач. Гьакъикъатдани, адан тан ва хилер зурба чайдандиз ухшар я. И тарарин жуьреяр вири муьжуьд ава. Абурукай ругуд жуьре анжах Мадагаскарда экъечIзава. Сад — Австралияда, муькуьдини анжах Африкада дуьшуьш жеда.
Баобаб дуьньяда виридалайни яцIу тарарикай сад я. ЯцIувиликай а тарциз кьурагь вахтунда кьеж хуьнин карда куьмек жезва. Кьакьанвал 25 метрдив кьван агакьда. И тарцин кIарас хъуьтуьлди, гзаф яд квайди я. Абур агъзур йисал кьван яшамиш жеда. Алимри субутнавайвал, виридалайни еке баобабар тIебиатда 2-3 агъзур йисав агакьна яшамиш хьун мумкин я.
Вилик вахтара и зурба тарар инсанри яшамиш ва далдаламиш жедай чкаяр яз ишлемишзавай. Австралияда гьатта “дустагъдин баобаб” ава. Ам 19-асирдин эхирра азадвиликай магьрум авурбур твадай дустагъдин еринда ишлемишна.
Чкадин агьалийри баобабдин пешер салатдик кутазва. Емишрикай лагьайтIа, дарманар авунин карда менфят къачузва.
Гьазурайди — Куругъли Ферзалиев
