ТIебиат гьеле ксанама,

Тарар-тамар ахварама,

Гуьзел май лап яргъа ама,

Уях я са алучад тар.

 

Вилик кума яран къаяр,

Хьун мумкин я къайи гарар,

Тахьурай ваз зерре зарар,

Цуькведавай алучад тар.

 

Чархачи я вун гатфарин,

Цуькверни — абур багъларин,

Хуш я ваз мани чIижерин

Вирт кIватIзавай, алучад тар.

 

Дагъдин абур ятIа кфил,

Цуьквер юкьва жеда билбил,

Гуьзел бере акур гуьгьуьл

Хуррам жечни, алучад тар!

 

Гьарнихъ хилер ахъайнавай,

Лацу либас алукIнавай,

ЦIийи свас хьиз, чIаганавай,

Салан абур, алучад тар.

 

Ви сериндик ацукьайла,

Пис крар яргъаз къакъатда.

Къуй дуьнья хьуй саламатда,

Алагуьзли алучад тар.

 

И дуьньядин терез я вахт,

Ракъин нурарни — ви къуват.

ГьикI лугьудач ваз за Тават,

Емиш гъидай алучад тар!

 

Битмиш хьайи сифте емиш

БицIекри, къвез, ида дадмиш.

Дегиш тахьуй ихьтин ериш,

Аферин ваз, алучад тар!

 

Гьар са юкъуз пакам кьиляй

Салам гуда за ваз рикIяй,

Ви акунри акьван дигай

Шадарда чун, алучад тар.

 

Сагърай вун, Света вах,

Къелем гъайи, авачир тах.

Са кIусни вун туш хьи сарсах,

Гелкъуьн такIан алучад тар.

 

Цан техйизмай мезрейрикай,

Артух жезвай зегьемрикай —

И дуьньядин веремрикай

Хабар туш ваз, алучад тар.

 

Ви емишдиз лап ширин дад

Ганавай а чIехи устад —

ТIебиат хуьн, тавун барбатI

Чи буржи я, алучад тар.

Ших Мурадов