И йикъара Кьасумхуьруьн И.Тагьирован тIварцIихъ галай медениятдин дараматдин гъвечIи залда Сулейман-Стальский райондин мектебра кIелзавай аялрин арада «Чан алай классика» тIвар алай Вирироссиядин жегьил кIелчийрин конкурсдин райондин пай кьиле фена. Идакай «Лезги газетдиз» райадминистрациядин пресс-къуллугъди хабар гузва.
Устадвилелди кIелдайбурун конкурсда 5-11-классра кIелзавай аялри иштиракна. Мярекатда абуру кIелунин устадвилин ва артиствилин алакьунар къалурна. Хъсан кIелдайбур хкягъунин конкурсдин нетижада Курхуьруьн 1-нумрадин мектебда кIелзавай Диаля Магьмудова, Герейханов хуьруьн 2-нумрадин мектебда кIелзавай Минара Сейфуллаева ва Мурад Сефералиев гъалиб хьана.
Тафаватлу хьайи ученикар дипломралди къейдна. Гила абур конкурсдин региондин паюна иштиракуниз гьазур жеда.
«Лезги газет»
