13-17-февралдиз Московский областдин Чехов шегьерда 21 йисал кьван яш хьанвай жегьил спортсменрин арада армрестлингдай Россиядин кIвенкIвечивал патал акъажунар кьиле фена.

«Лезги газетдиз» Сулейман-Стальский райондин пресс-къуллугъди хабар гузвайвал, акъажунра и райондин физический культурадин, спортдин, туризмдин ва жегьилрин крарин комитетди теклифай командадини иштиракна. РФ-дин лайихлу тренер Малик Тагьирбегован регьбервилик квай команда 5 спортсмендикай ибарат тир.

Акъажунрин нетижада Равиль Тагьирбегова 1-чка, Гьасан Мегьамедханова 3-чка ва Беслан Магьмудова 3-чка кьуна. Агалкьунар хьайи пуд спортсменни Россиядин хкягъай командадик акатна. Гила абуру армрестлингдай Европадин кIвенкIвечивал патал май вацра Грецияда кьиле фидай акъажунра иштиракда. Адалай гъейри, жаван спортсменри алай йисан 30-августдилай 8-сентябрдалди дуьньядин кIвенкIвечивал патал Польшада кьиле фидай акъажунрани чпин къуватар къалурда.

«Лезги газет»