Дуьздал акъудна
Иракда террористрин “ИГ” (ам Россияда къадагъа авунва) дестедиз пулдин такьатар ахъайзавай чIехи сеть дуьздал акъудна. Идакай “AI Sumaria” чешмеди хабар гузва.
Чешмедин делилралди, такьатрин сеть са шумуд хилез пай хьанвайтIани, санлай боевикриз пулдин такьатар ракъурзавай дестеди жуьреба-жуьре уьлквейра чпин гьерекатар кьилиз акъудзавай. Махсус къуллугъдин арзада къалурнавайвал, пул жуьреба-жуьре фирмайрин ва туьквенрин куьмекдалди са шумуд саягъда агакьарзавай. ИкI, такьатрин гьерекатар далдаламишзавай, абур боевикрал агакьарунин гьалдал гуьзчивал тухунин кар четин хьун патал шудургъаяр арадал гъизвай. Такьатар чара авунин гьерекатра иштиракай уьлквеяр ва а дестедик квай инсанрин кьадар тайиндиз тестикьарнавач.
Идалай вилик хабар гайивал, Сириядин мулкара США-дин куьмекдалди террористрихъ галаз женг тухузвай яракьлу кьушунри Иракдив и уьлкведай тир ИГ-дин 150 аскер вахкана.
Къейдзавайвал, США-ди куьмекзавай курдринни арабрин дестейрин союзди — ДСС-ди (Сириядин демократиядин къуватар) — Сирияда ИГ-дин ихтиярда амай мулкар террористрикай михьиз алахъзава.
Хаталувиликай малумарна
Белоруссиядин президент А.Лукашенкоди, Америкадин цIийи ракетаяр Европадиз акъудайтIа, Москвадихъ галаз санал серенжемар кьабулуниз гьазур тирдан гьакъиндай малумарна. Адан гафар “Новости” РИА-ди раижна.
Лукашенкоди гьисабзавайвал, американвийри чеб юкьван ва гъвечIи мензилдин ракетаяр тергунин гьакъиндай тир икьрардай экъечIуникай менфят къачун, Европада цIийи ракетаяр эцигун мумкин я. Республикадин кьилин гафарай, гьа и кар себеб яз Минскди Россиядихъ галаз санал жавабдин гьерекатрин гьакъиндай фагьум-фикир авун лазим я. Лукашенкоди Америкадин ракетаяр Украинадин мулкара эцигунин хаталувал авайди къейдна.
Гуьруьшдиз гьазур я
Туьркиядин президент Р.Эрдогана Д.Трампахъ галаз гуьруьшмиш жез кIанзавайдакай малумарна. Идакай ада “CNN Turk” телеканалда интервью кьиле фейи вахтунда лагьана.
Туьркиядин регьбердин гафарай, Трампахъ галаз адан алакъаяр хъсанзава ва и карди гзаф месэлаяр регьятдаказ гьялдай мумкинвал гуда. “За адан патай США-диз атунин теклиф кьабулнава, амма сифте нубатда адаз за вич Туьркияда гуьзлемишзавайдакай лагьана”, — къейдна Эрдогана.
Эрдогана тестикьарайвал, гуьруьш 31-мартдилай кьулухъ кьиле фин мумкин я. Идалайни гъейри, Туьркиядин президентди алава хъувурвал, Россиядихъ галазни алакъаяр бегьерлудаказ виликди физва.
Р. Эрдогана 2018-йисан декабрдиз Трампаз Анкарадиз атун теклифнай. Лацу кIвали Д.Трамп Туьркиядин регьбердихъ галаз гуьруьшмиш жез гьазур тирдакай тестикьарна.
Польшадин наразивал
Польшадин гьуьлерин майишатдин ва къенепатан гимийрин гьерекатрин министр Марек Грубарчика малумарайвал, Вислидин косадал (адан яргъивал 65 километр я) къанал туькIуьрунин месэлада Еврокомиссияди Россиядин итижар хуьзва. Адан гафарай, цин рехъ туькIуьруниз талукь наразивилер Россиядин шикаятдилай кьулухъ башламиш хьана. Идакай Польшадин радиоди хабар гана.
Польшадин чиновник инанмиш тирвал, къанал арадал гъунин месэла тамамарзавай органдиз Москвади таъсирна. Гьавиляй ЕК-ди къаналдин жигьетдай Польшадин пешекаррихъ галаз суьгьбетар кьиле тухун кьетIна.
Грубарчика кьетIендиз къейд авурвал, къанал арадал гъуни, гуя Россияди малумарнавай хьиз, элкъуьрна кьунвай тIебиат патал къурхулувал арадал гъидач. Ада алава хъувурвал, тIебиатдиз зарар хьун сифте къейд авурди Россия я. Гуьгъуьнлай масабурни и фикирдал атана.
Чешмеди малумарзавайвал, къанал туькIуьрунин къимет тахминан 15 миллиард манатдиз барабар я. КIвалахар, Евросоюздин фондарин иштираквал авачиз, Польшадин бюджетдин пулдихъ тамамарда.
Къаналди Вислинский залив Балтийский гьуьлуьхъ галаз алакъалу ийида. И карди Польшадин гимийриз, Россиядин сергьятрилай элячIна, чпин портариз гьахьдай мумкинвал гуда.
Гьабибахъай кичIезва
Россиядин машгьур спортсмен Гьабиб Нурмегьамедован менеджер Али Абдель-Азизан фикирдалди, ирландви Конор Макгрегораз Гьабибахъ галаз кьисасдин бягьс кьиле тухуз кIанзавач. Идан гьакъиндай ада “TMZ” чешмедиз гайи интервьюда къейдна.
“Макгрегора кьвед лагьай бягьс тухун тIалабнач. Адаз ва адан хизандиз, гьатта вири Ирландиядизни кьвед лагьай бягьс кIанзавач. Ана кьисасдин бягьсиникай рахаз кIанзавай садни авач. Абуруз Нурмегьамедовахъай кичIезва”, — лагьана Абдель-Азиза журналистриз.
Менеджерди кьвед лагьай сеферда тешкилдай бягьс Гь.Нурмегьамедован команда патал менфятлуди хьунал шак гъизва.
Гьазурайди — Куругъли Ферзалиев
