Гьуьрметлу “Лезги газетдин” редакция!
Алатай йисан декабрдиз чи 4 йиса авай гада Имам пис начагъ хьана. Вич-вичик кумачир аял Махачкъалада, республикадин садакай масадак акатдай азаррин центрада, реанимациядин ва интенсивный терапиядин отделенида, къаткурна. Духтурри аял залан жуьредин менингоэнцефалитдикди начагъ тирди, ам кIвачел ахкьалт хъувунин умудлувал тIимил авайди малумарна…
Имам сагъар хъувун винидихъ тIвар кьунвай отделенидин заведующий Яралиев Мегьамедзагьир Мегьамедагъаевичан гуьзчивилик кваз ва адан хсуси иштираквал аваз кьиле фена. Чун ам вичин къуллугъдин везифайрив жавабдарвал дериндай гьисс авуналди ва Гиппократан кьинез вафалувал къалуруналди эгечIунин тегьердилай рази яз амукьна. Духтур югъдини йифди чи ва гьакI амай аялринни сагъламвал патал женгина хьана. Кьабулай серенжемрин нетижада 17-суткадилай Имам вич-вичел хтана. Ам ажалдин къармахрай акъатна.
Гуьгъуьнлай Имам Санкт-Петербургда авай аялрин садакай масадак акатдай азаррин НИИ-да сагъарун давамарна. Аялдин гьал ахтармишайдалай гуьгъуьниз ам сагъарзавай духтурри чи ватанэгьлидин пешекарвилиз еке къимет гана.
Эхь, авазва чи Дагьустандани савадлу, Гиппократан кьинез вафалу духтурар.
Багъри газетдикай менфят къачуналди, чи хизандин патай Мегьамедзагьир Мегьамедагъаевичаз чи бала кIвачел ахкьалдар хъувунай, вичин намуслу зегьметдай чухсагъул лугьуз кIанзава. Къуй вичихъ чандин сагъвал, дережаяр мадни виниз хьурай!
Кьасумхуьр, Алисеноврин хизан.
