26-февралдиз республикадин законар акъуддай, исполнительный ва муниципальный властдин органрин руководителрихъ галаз кьиле тухвай совещанидал Дагъустандин Кьил Владимир Васильева вири жавабдар ксариз регионда угарный газдилай зегьерламиш хьунин ва газдин сетра аварияр арадал атунин дуьшуьшар артух хьунихъ галаз алакъалу месэладай мукьуфдивди кьил акъудуниз ва гьалар хъсан патахъ дегишарунин мураддалди серенжемар кьабулуниз эвер гана. Идан гьакъиндай “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гана.
И месэла кудун квехъ галаз алакъалу я лагьайтIа, алатай йифиз Буйнакскда гьахьтин жуьредин дуьшуьш арадал атанвайдан патахъай малумат агакьна. Ина угарный газдилай зегьерламиш хьуникди пуд касдиз хасаратвал хьана, Сергокъала ва Къаякент районра газдин сварка авунвай чкадилай турбади фер гунин нетижада кьве хуьруьн агьалияр газдалди таъминарун акъвазарна.
“Чина нагьакьан крар арадал атанва: йисан сифте кьилерилай угарный газдилай зегьерламиш хьунин ирид дуьшуьш хьанва. Нетижада 24 касдиз хасаратвал, абурукай 5 кас телеф хьана. Чна технический жигьетдай пайгардик квачиз хьунин нетижада мад бедбахтвилин гьалар арадал атанвайди тестикьарзава. Чна и барадай вуч фикирдай акъудзаватIа, гьа кардай кьил акъудун герек я. Зун винидихъ тIвар кьунвай районрин кьилерихъ галаз рахана. Малум хьайивал, чпин мулкарал гьихьтин крар кьиле физватIа, вири руководителриз чизвач. Чкайрал системади кIвалахун лазим я. Гьалар гуьзчивилик кутур, газдихъ галаз алакъалу чи къуллугъди иллаки гьа къуллугъ руководство авачиз амукьзавай шартIара гьикI кIвалахзаватIа, гьа кардай кьил акъуд. И месэлаяр гьял тийиз хейлин йисар алатнава. Гила лагьайтIа, республикада газдалди таъминарунин хиле къайда тунин кIвалах кьиле физва. Зун инанмиш тирвал, чалай газдалди таъминарунин барадай гьалар хъсанвилихъ дегишариз алакьда”, — лагьана Владимир Васильева.
Совещание кьиле фидай чIавуз Дагъустандин вице — премьер Владимир Лемешкоди малумарайвал, Сергокъала ва Къаякент районра турбайрай газ къецихъ акъатун яргъал вегьин тавуна акъвазарна. Алай вахтунда муниципальный тешкилатра кьве агъзурдалай виниз агьалияр газдалди таъминарунин кIвалах къайдадик кухтунва.
«Лезги газет»
