И йикъара Ахцегь райондин кьил Осман Абдулкеримова нубатдин сеферда агьалияр кьабулунин серенжем кьиле тухвана. «Лезги газетдиз» Ахцегь райондин администрациядин пресс-къуллугъди хабар гузвайвал, райондин кьили гьар вацран эхиримжи арбедин юкъуз агьалияр кьабулзава. Нубатдин сеферда чпин хсуси месэлаяр гваз 11 агьали райондин кьилив атана.
Арзачийрикай тир М.Мегьамедовади, М.Наврузовади ва С.Рамазанова чпиз пешедин рекьяй кIвалах кIанзавайдакай лагьана. Райондин кьил О.Абдулкеримова жегьил кадрияр герек тирдакай, абурун важиблувиликай къейдунихъ галаз сад хьиз, арзачийрин пешекарвилив кьадай тешкилатра кIвалахар жагъурунин карда куьмек гун хиве кьуна ва талукь идарайриз чарар ракъурна.
Афгъандин вакъиайрин ветеран И.Рамазанова яшайишдин шартIар хъсанарунин месэлада куьмек тIалабна. Райондин кьилив чпин мажибдин кьадар артухаруниз, чилин участокар чара авуниз талукь дердияр гвайбурни атана.
Осман Абдулкеримова гьар са арзачидин месэладихъ яб акална, метлеблу жавабар гана. Вири месэлаяр вичин гуьзчивилик кутун кьетIна.
«Лезги газет»
