Мукьвара хейлин йисара Дербент шегьердин аялрин лечобъединенидин кьилин духтур яз кIвалахай Жумаедин Седрединович Гьалимов рагьметдиз фена.
Ж.С.Гьалимов 1940-йисуз Ахцегь райондин Ялцугърин хуьре дидедиз хьана. 1958-йисуз медучилище акьалтIарай жегьил пешекар Хив райондин Агъа Яракрин хуьруьн ФАП-дин заведующийвиле тайинарна. Са йисалай ам армиядиз фена. Германияда къуллугъзавай йисара Ж.Гьалимова ФАП-дин начальникдин везифаяр тамамарна.
Армиядилай гуьгъуьниз Ж.Гьалимова Ростовдин мединститут акьалтIарна. Медицинадин рекьяй кьилин образование ва тежриба авай пешекар Дербент шегьердин аялрин лечобъединенидиз рекье туна. Сифте духтур-педиатр, ахпа аялрин поликлиникадин, стационардин отделенидин заведующий яз кIвалахна. 1983-йисалай инихъ Ж.Гьалимова Дербент шегьердин аялрин лечобъединенидин кьилин духтур яз зегьмет чIугвазвай.
Жумаедин Седрединовичан тIвар иллаки Кьиблепатан Дагъустанда аялрин хъсан духтур яз машгьур хьана. КIвалахзавай йисара ада куьмек гайи кьван аялрин сан-гьисаб кьун четин кар я.
Хейлин йисара медицинадин хиле бегьерлудаказ кIвалахунай Жумаедин Седрединовичаз “РД-дин лайихлу духтур” лагьай гьуьрметдин тIвар гана.
Къейд ийин хьи, Ж.Гьалимова Дербент шегьердин общественный уьмуьрдани активнидаказ иштиракзавай. Ам “Лезги газетдин” амадагни тир. Хайи чIалал акъатзавай газет гьар йисуз вичини кхьизвай, амайбуруни кхьин патал таблигъат тухузвай.
“Лезги газетдин” редакциядин коллективди Жумаедин Седрединович Гьалимов рагьметдиз финихъ галаз алакъалу яз адан хизанриз ва мукьва-кьилийриз башсагълугъвал гузва.
