И йикъара Махачкъалада кьиле фейи “Халкьдин коллектив” лагьай тIвар тестикьарун патал халкьдин яратмишунрин коллективрин конкурс-килигуна Сулейман-Стальский райондай тир “Кьасумхуьруьн далдамчияр” ансамблдини иштиракна. Нетижада ансамблди “Халкьдин коллектив” лагьай тIварцIиз вич кутугайди тирди нубатдин сеферда тестикьар хъувуна. И тIвар коллективриз чешнелу кIвалахдай, тамамарунин устадвиляй, репертуардин виниз тир художественный дережадай ва репертуар милли, гьакIни алай аямдин хъсан эсерралди артухарунай гузва.

— “Кьасумхуьруьн далдамчияр” ансамбль 1958-йисуз тешкилна, — лугьузва адан руководитель Агъарагьим Агъарагьимова. — 1960-йисуз адаз “Халкьдин коллектив” лагьай тIвар ганай. Алатнавай 61 йисан девирда далдамчийрин ансамбль баркаллу рехъ фена. ИкI, ада кьве сеферда Москвада кьиле фейи культурадин декадада иштиракна. Ансамблди “Советский Дагестан” фильмдани  чпин устадвал къалурна.

Чаз алава хъийиз кIанзава хьи, “Кьасумхуьруьн далдамчияр” ансамбль 2010-йисуз цIийи музыкантрикай арадал хкана. Ам Ахцегьа лезгийрин игитвилин “Шарвили” эпосдин суварин, Дербентда, Махачкъалада ва масанра тухвай са шумуд фестивалдин, конкурсрин, килигунрин лауреат, гъалибчи я.

Хазран Кьасумов