Дагъустандин здравоохра­не­нидин министерстводин пресс-къуллугъди  хабар гузвайвал,  чи республикада уьмуьрдиз кечирмишун давам жезвай “Земский доктор” программадихъ галаз санал  алай йисуз  “Земский фельдшер” программани кардик акатда. Ам юкьван хилен медицинадин къуллугъчияр, ФАП-рани тади куьмекдин къуллугъда зегьмет чIуг­ваз кIандай ксар патал фикирдиз къачунва. Кьилин макьсад —  медицинадин хилен къуллугъчияр хуьрера, шегьердин жуьредин посёлокра ва чIехи тушир шегьерра  (50 агъзурдал къведалди агьалияр яшамиш жезвай) кIвалахунал ашкъиламишун я.

“Земский доктор” программадин нетижалувал агъадихъ галай рекъемри къалурзава: 2012-йисалай Дагъустандин хуьрерин больницайра 1080 пешекар кIвалахал акъвазна. Анжах са алатай йисуз медицинадин 200 къуллугъчи  кIвалахун патал “яргъаз” рекье гьатна.

Къейд авун лазим я хьи, “Земский доктор” программа уьмуьрдиз кечирмишуни  амбулаторияр ва поликлиникаяр лазим пешекарралди таъминардай мумкинвал гузва. Пешекаррин кьитвал алудиз, ФАП-ра кIвалахдай къуллугъчияр жа­гъуриз екез куьмекзава.

Чешмеди мадни хабар гузвайвал, алай йисуз 224 духтурдиз ва 10 фельдшердиз “Зем­ский доктор” ва “Земский фельд­шер” программайрикай менфят къачудай мумкинвал ава. И прог­раммайрай гьукуматди са сеферда гудай пулунин кьадарди духтурар патал 1 миллион ма­нат, фельдшерар патални зур миллион манат тешкилзава. Иштиракчийривай ийизвай кьилин истемишунрик акатзава: 50 йисал къведалди яшар аваз хьун ва тамам ставкадал алаз 5 йисуз кIвалахун.

РикIел хкин: винидихъ тIварар кьунвай программайра иштиракун патал сифте нубатда куьне хкянавай регионда ачух вакансияр аватIа чирун герек я. И кар патал чкадин здравоохраненидин министерстводиз ва я управленидиз фена кIанда. Бязи делилар муниципалитетрин сайтрайни жагъида.

Гьихьтин  документар герек  я?

Кандидатди ФОМС-дин отделенидиз программада иштиракиз кIанзавайвилин арза ракъурун герек я. Адахъ галаз сад хьиз агъадихъ галай документарни:

паспорт;

яшамиш жезвай чкадикай малуматар;

диплом ва образованидин гьакъиндай маса документар  (ординатура, интернатура куьтягьуниз талукь ва  мсб.);

СНИЛС;

ИНН;

зегьметдин икьрар ва штатдиз кьабулунин приказ;

здравоохраненидин министерстводихъ галаз икьрар кутIунунал разивал къалурнавай чар;

банкда ачухнавай счётдин реквизитар.

Чи мухбир