И йикъара Кьурагь районда 23-февралдин сувариз талукь шад мярекат кьиле фена. И гьакъиндай «Лезги газетдиз» райадминистрациядин пресс-къуллугъди хабар гузва. Гуьрчег залда Ватандин ЧIехи дяведин йисарин иштиракчийрин хендедаяр, далу пата зегьмет чIугурбур, Афгъанистандин, Чечнядин ва маса женгерин иштиракчияр, хуьрерин кьилер, райондин тешкилатринни идарайрин жавабдар къуллугъчияр ва теклифнавай мугьманар кIватI хьанвай. 

Мярекат культурадинни туризмдин центрадин пешекар Марина Айдунбеговади ачухна. Суварин иштиракчияр тебрикайдалай кьулухъ, сифте гаф хатасузвилин рекьяй райондин кьилин заместитель Альберт Исаеваз гана. Ада райондин кьил З.Азизован, райондин агьалийрин ва вичин патайни иштиракчийриз сувар мубаракна, ватан хуьнин карда жуьрэтлувал, мягькемвал ва игитвал къалурай ватанэгьлийриз чухсагъул малумарна.

Тебрикдин гафар райондин ветеранрин Советдин председатель Фахрудин Мирзоева, Афгъанистандин дяведин иштиракчи Гьажигьуьсейн Хинабиева, Чечнядин дяведин иштиракчи Тарик Исакьова, райондин прокурор Фируза Лагметовади, хуьрерин поселенийрихъ галаз кIвалахар кьиле тухузвай Эльмира Исаевади, райондин ОМВД-дин начальникдин везифаяр вахтуналди тамамарзавай Селим Селимова, Хпуькьрин хуьруьн кьил Гьажикъурбан Харгушева, Кумух хуьруьн кьил Руслан Улубегова, УСЗН-дин начальник Сейфудин Жамалдинова ва масабуру лагьана.

Мярекат гурлу авун патал райондин музыкантри, манидарри маниярни тамамарна. Теклифнавай мугьманриз вирибуруз Альберт Исаева райондин кьил Замир Азизован патай къиметлу савкьатар гана.

«Лезги газет»