Аквазвайвал, цIинин кьуьд чи республикада чуьллера, багълара ва уьзуьмлухра агротехникадин кIвалахар, зулуз хьиз, давамарун патал къулайди яз акъатзава. Ихьтин шартIарикай менфят къачуналди, Дербент шегьердин паркара ва куьчейрин къерехра авай тарарихъ гелкъуьнин кIвалахар кьиле тухузва. Шегьер къацу авунин карда коммунальный карханайрин, иллаки горзеленхоздин коллективрихъ галаз санал шегьердин администрациядин работникри, студентри, мектебрин аялри, са жерге магьлейрин агьалийрини рикI гваз иштиракзава.
Шегьер аваданламишунин, паркар гегьеншарунин кIвалахар алатай йисан ноябрдиз республикадин Кьил Владимир Васильева малумарай “Къацу километрияр” серенжемдин сергьятра аваз кьиле физва.
Нажмудин Самурскийдин тIварунихъ галай парк къадим Дербентда жегьилбурукай, цIийибурукай сад я. Мукьвара аниз атуналди, шегьердин администрациядин ва са жерге тешкилатрин работникри цIийи паркуна хейлин къелемар цана, авайбурун пунариз пер яна. Мярекатда иштиракай шегьердин мэр Хизри Абакарова малумарайвал, ихьтин серенжемар мукьвал-мукьвал тешкилда.
— Тар, къелем цун са акьван четин кIвалах туш. Им Дербент къацу авуник лайихлу пай кутун я, — лагьана ада.
Винидихъ къейднавайвал, Дербент къацу авуник шегьердин мектебрин муаллимри ва анра чирвилерни тербия къачузвай аялрини еке пай кутазва. И мукьвара и барадай 3-нумрадин юкьван мектебдин аяларни тафаватлу хьана. Муаллимар тир Н.Гьуьсейновадин, Г.Войченкодин ва З.Алибеговадин регьбервилик кваз, абуру “Нарын-къеле”-дин мукьув гвай “Сосновый бор” лугьудай чкада шамагъаждин 80 къелем цана, авайбур кул-кусдикай михьна, герек авачир хилер атIана.
Кьуьд ятIани, шегьердин Къ.Агъасиеван тIварунихъ галай проспектда, генерал Саидован, генерал Гьайдарован, Гагаринан тIварарихъ галай ва маса куьчейрин къерехра “Къацу километрияр” серенжем давам жезва.
Нариман Къарибов
