Малум тирвал, Етим Эминан 180 йисан юбилейдихъ галаз алакъалу яз Лезгийрин СтIал Сулейманан тIварунихъ галай госмуздрамтеатрда Ибрагьим Гьуьсейнован “Етим Эмин” трагедиядай Дагъустандин халкьдин артист, театрдин кьилин режиссер Мирзебег Мирзебегова тамаша эцигна. Заз адаз алатай йисан декабрдин вацра Махачкъалада ва Кьасумхуьрел килигдай мумкинвал хьана. Лагьана кIанда, режиссердилай кIвалах устаддаказ алакьнава. Ана машгьур артистарни хъсандиз къугъвазва.
Амма къе заз “Етим Эмин” тамашада къугъвазвай виридалайни гъвечIи артистка Марьям Загьирбеговадикай лугьуз кIанзава. Марьяма Дербент шегьердин 21-нумрадин юкьван школада, 4-классда кIелзава. КIелунрин, ахлакьдин жигьетдай, гьакIни школадин общественный уьмуьрда, шегьерда школьникрин арада тухузвай конкурсра, фестивалра, олимпиадайра иштирак авунай ам гзафбуруз чешне я. ИкI, алатай йисуз къадим шегьерда Етим Эминан юбилейдиз талукь яз шиирар кIелунай тухвай конкурсда, Сардар Абилан “Вун етим туш” шиир кIелуналди, Марьяма 1-чка кьуна.
Марьяма “Етим Эмин” тамашада чIехи шаирдин руш Мислиматан роль устадвилелди тамамарзава.
— Вилик йисара театрда эцигай и тамашада Мислиматан ролда театрдин жегьил артисткаяр къугъвайди я, — лугьузва Дагъустан Республикадин лайихлу артист Агъахан Агъаханова. — Завай инанмишвилелди лугьуз жеда хьи, абурукай Марьяма яратмишай Мислиматан къамат тамашачийри иллаки хушвилелди кьабулна.
— Марьям кьетIен бажарагъ, алакьунар авай руш я, — къейдзава театрдин кьилин режиссер Мирзебег Мирзебегова. — Гележегда хкядай пешедикай хабар кьурла, Марьяма, “Закай режиссёр жеда”, лугьузва. Мураддив агакьрай ам!
Малум хьайивал, Марьям Загьирбегова идалай виликни са шумуд ролда къугъвана. Ада, гьеле 5 йиса аваз, Дагъустандин халкьдин шаир Ханбиче Хаметовадин “Марфадин стIалар” пьесадай эцигай тамашада дяведин аялрин (Рамизан ва Маликадин) ролар тамамарнай.
Шегьерда дидедиз хьанатIани, Марьямаз лезги чIал, лезги шаиррин шиирар хуралай чида. КIвале, хизандин арада ам дидед чIалал рахазва.
Марьям театрда литературадинни драмадин отделдин заведующийвиле кIвалахзавай Эминат Загьирбеговадин хтул я. И кардини гъвечIи рушаз искусствода камар къачуниз куьмек тагана тазвач.
“Бажарагъ валай гьич са касдини чир тавунвай тайин са кIвалах ийиз алакьун я”, — лагьанай Польшадин литературадин машгьур векил Альфред Конара. Эхь, бажарагъ инсандиз тIебиатди гузвай пай я. Чи гъвечIи артистка Марьям Загьирбеговадини и кар тестикьарзава.
Хазран Кьасумов
