11-февралдиз РД-дин Гьукуматдин Председателдин заместитель — РД-дин хуьруьн майишатдин ва суьрсетдин министр Абдулмуслим Абдулмуслимова республикадин яшайишдин идарайриз некIедин ерилу продукция гунин месэлайриз талукьарнавай совещание кьиле тухвана.
И месэла веревирд авунин кIвалахда РД-да авай Роспотребнадзордин территориальный управленидин руководитель Элеонора Омариевади, РД-дин Россельхознадзордин руководитель Къурбан Рамазанова, госветнадзордин управленидин отделдин начальник Гьажимегьамед Азаева, Дагъустандин ветеринариядин къуллугъдин руководитель Мегьамед Шапиева ва “Республикадин ветеринариядин лаборатория” ГБУ-дин ветеринариядин сертификациядин отделдин начальник Абдурагьман Абакарова иштиракна.
Гьялзавай месэладиз талукь яз Абдулмуслим Абдулмуслимова къейдна хьи, алай вахтунда Дагъустандин руководстводи республикадин мулкунал маса гузвай недай-хъвадай продукциядин хатасузвал ва ери хъсанарунин месэладиз кьетIен фикир гузва. Кьилди къачуртIа, Махачкъаладин, Каспийскдин, Буйнакскдин, Дербентдин ва маса шегьеррин чирвилер гудай ва сагъламвилинни профилактикадин идарайриз ачухзавай некIедин продукциядин ери мукьуфдивди ахтармишунин чарасузвал арадал атанва.
Гьа са вахтунда РД-дин Гьукуматдин вице-премьерди некIедин халис продукция гьасилзавай дагъустанвийрин терефни хуьн чарасуз тирди къейдна, гьикI лагьайтIа, хейлинбурувай республикадиз гъизвай къалп продукциядинни экологиядин жигьетдай михьи продукциядин къиметрин арада еке тафават авайвиляй, яшайишдин идарайриз гун патал савда ийидайла, конкуренциядиз дурум гуз жезвач.
“Республикадин руководстводи а кардиз интерес ийизва хьи, чи школайриз, аялрин бахчайриз ва больницайриз анжах ерилу недай-хъвадай продукция гун лазим я. Идахъ галаз алакъалу яз, Роспотребнадзордин, Россельхознадзордин ва ветеринариядин къуллугърин векилрикай комиссия тешкилунин къарар кьабулнава. Абур яшайишдин идарайриз гузвай некIедин продукциядин ери ахтармишунал машгъул жеда”.
Мярекат кьиле физвай вахтунда веревирд ийизвай месэладай чпин фикирар са жерге иштиракчийрини лагьана. Совещанидин эхирдай Абдулмуслим Абдулмуслимова жавабдар ксариз къарагъарнавай месэладин жигьетдай сифте нубатдин серенжемар кьабулунин тапшуругъар гана.
«Лезги газет»
