Дагъустан Республикадин Гьукуматдин Председатель Артем Здунован регьбервилик кваз регионда инвестпроектар кьилиз акъудунин месэладай совещание хьана. Идан гьакъиндай “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гана.
Кьилди къачуртIа, совещанидал вад проектдиз килигна. Ингье абур: Новолак районда “Зи Дагъустан” агропарк, Махачкъала шегьердин Ленинкент поселокда теплицайрин “Агромир” комплекс арадал гъун, “Шуьшедин чIунар гьасилун ва абурукай шейэр гьазурун”, Каспийскда “Полиэтиленар гьасилдай ва гьялдай производство кардик кутун”, Махачкъала шегьердин Ленинский комсомолдин паркуна “Кьуд патаз тамашдай чарх” аттракцион ачухун.
Республикадин Гьукуматдин Председателдин гафаралди, и инвестпроектар кьилиз акъудун гьа са вахтунда са шумуд министерстводин гуьзчивилик хьун лазим я.
РД-дин карчивилин ва инвестицийрин рекьяй Агентстводин руководитель Гьажи Гьасанова республикадин мулкунал а проектар кьилиз акъудзавай гьалдин гьакъиндай малумат гана.
ИкI, “Агромир” проектдал асаслу яз, санлай къачурла, 10 гектардин майдандал йисан кьиляй-кьилди помидорар ва афнияр битмишардай алай аямдин теплицайрин автоматламишнавай комплекс эцигун къалурнава.
“Шуьшедин чIунар гьасилун ва абурукай шейэр гьазурун” проектдин сергьятра аваз лап цIийи жуьрейрин технологияр ишлемишуналди, шуьшедин чIунар гьасилдай, гуьгъуьнлай абур промышленность патал композитный материалриз элкъуьрдай алай аямдин автоматламишнавай завод эцигун пландик кутунва. “ДагПолимер” ООО-ди Каспийскда полиэтиленар гьасилдай ва гьялдай производство кардик кутун планламишнава. “Зи Дагъустан” автопаркуниз талукь проектдал асаслу яз, кIвалахдин 7 агъзур чка тешкилун фикирдиз къачунва.
Махачкъалада кьуд патаз тамашдай чарх кардик кутунин проектдиз талукь малуматдихъ яб акалуналди, Артем Здунова кIватI хьанвайбуруз и месэладай общественностдин яб акалунар тешкилун ва и объектдин чарасузвилиз талукь яз агьалийрин фикирар гьихьтинбур ятIа чирун меслят къалурна.
Совещанидал проектар кьилиз акъудуниз талукь важиблу месэлаяр къарагъарна. Гуьруьшдин иштиракчийри абур веревирдна ва гьялдай рекьер тайинарна. Премьер-министрди талукь тир министерствойрин ва ведомствойрин кьиле авай ксариз лазим тир тапшуругъар гана.
Совещанида РД-дин Гьукуматдин Председателдин Сад лагьай заместитель Гьажимегьамед Гьуьсейнова, Дагъустан Республикадин Гьукуматдин Председателдин заместитель — республикадин хуьруьн майишатдин ва недай суьрсетдин министр Абдулмуслим Абдулмуслимова, са жерге министерствойрин, ведомствойрин, муниципальный тешкилатрин руководителри, проектар кардик кутун теклифай ксари иштиракна.
«Лезги газет»
