Дагъустандин образованидин ва илимдин министерстводи республикадин агьалийриз образованидин идарайрин кIвалахдиз аслу тушир къимет гунин (НОК) карда иштиракун теклифзава.
Къимет гун патал кваз кьуна кIанзавай терефар Россиядин образованидинни илимдин министерстводи образованидин гьар жуьре дережайрин идарайрин кIвалахдин ери ахтармишун патал туькIуьрнавай уьлчмейрихъ галаз кьадайвал фикирда кьунва. Иник идарадикай делилрин ачухвал ва абурук тIем акакьун, къуллугъар авунин шартIарин къулайвал ва абурукай менфят къачуз хьун, и ва я маса къуллугъ тамамарун патал гуьзлемишна кIанзавай вахт, къуллугъчияр эдеблудаказ, гьуьрметлудаказ, хъсанвал кIандай жуьреда, гъавурда аваз эгечIун ва тамамарнавай кIвалахдилай рази яз амукьун акатзава.
НОК-дин иштиракчи хьун патал www.bus.gov.ru сайтда малумат туна, я тахьайтIа, РД-дин образованидинни илимдин министерстводин официальный сайтдин “Обратная связь” чина са жерге суалриз жавабар гана кIанда.
Агакьнавай делилрин бинедаллаз образованидин идарайрин рейтингар туькIуьрзава ва абурун кIвалах хъсанарун патал РД-дин образованидинни илимдин министерстводин Общественный советдин теклифар гьазурзава.
Идалайни гъейри, РД-дин образованидинни илимдин министерстводи рейтингра виниз тир чкайриз лайихлу хьайи идарайрин кьилер гьевесламишун ва агъуз чкаяр кьурбур дисциплинадин (я тахьайтIа, маса жуьредин) жигьетдай жавабдарвилиз чIугун патал са жерге серенжемар фикирда кьунва.
Образованидин идарайрин кIвалахдиз аслу тушир къимет гунин нетижаяр РД-дин образованидинни илимдин министерстводин сайтда авай “Независимая оценка качества образования” чина ва www.bus.gov.ru сайтда чапда.
Къейд ийин, образованидин идарайрин кIвалахдиз аслу тушир къимет гунин серенжем Дагъустанда 2015-йисалай кьиле тухузва. Адан макьсад образованидин идарайри уьмуьрдиз куьчуьрмишзавай чирвилер гудай программайри агьалийрин игьтияжриз жаваб гузвани, гузвачни тайинарун я.
Аслу тушир къимет гунин серенжемдин нетижаяр Россиядин Федерациядин субъектрин исполнительный властдин органрин кIвалахдиз къимет гун патал лазим уьлчмейрин Сиягьдик кутунва ва алай йисуз и уьлчмеди РФ-дин регионрин арада Дагъустан Республика гьи чкадал жедатIа, гьадаз таъсирда.
Чи мухбир
