И мукьвара акъатай “Лезги газетда” штангаяр хкажуналди дуьньядин чемпионвилин тIвар къачур Ислам Рамазановакай кхьенвай макъала авай. Ана эхирдай «Лезги халкьдин арадай викIегь рухваярни рушар гзаф акъатрай!» лагьана алхишнавай. И гафар кIелайла, са викIегь хцикай кьве цIар кхьидай фикир зи кьилизни атана…
Мегьарамдхуьруьнви Руслан Балагьмедован гада Замиран рикI кьуршахар кьунал гъвечIи чIавалай алай. Сифтедай ада, КцIарай атана, чи районда са шумуд йисуз аялриз спортдин и жуьредин сирер чирай Жарулагь Шингарован, гуьгъуьнлай Тельман Халидован гъилик вердишвилер къачуна.
2014- йисуз кьисметди Балагьмедоврин хизан, 8-класс куьтягьай Замирни галаз, Ставрополь шегьердиз акъудна. Ина, школада кIелдайла, аялдин алакьунрик чкадин тренердин вил хкIуна. 9-класс акьалтIарна, Замир Ставрополдин олимпиададин резервдин училищедик экечIна. Ана студентди Россиядин лайихлу тренер Руслан Кочуеван гъилик устадвал хкажун патал алахъунар давамарна. Адани жегьил спортсмендиз самбодин, дзюдодин гьеле чин тийиз амай сирерай кьил акъудиз куьмекна.
Алатай 3 йисуз Замира хейлин акъажунра иштиракна, гьа гьисабдай яз — Россиядин чемпионатрани. Амма анра приздин чкаяр кьаз алакьначир. ЯтIани я ам вич, я фин-хтунриз гзаф харжар акъатай буба, я гьакьван алахъунар авур тренер садни руьгьдай аватнач. Аквадай гьаларай, вичин кеспи дериндай чизвай тренерди спортсмендин агалкьунар гьеле вилик кумайди гьиссзавай. Яргъал фенатIани, а йикъар алукьна. 2017-йисуз Замира са гъилди спортдин кьве жуьредайни мастервиле кандидатвилин нормаяр ацIурна. Йисни алатнач, шаз ада самбодай СКФО-дин кIвенкIвечивал патал акъажунра чIехибурун арада 1-чка кьуна, спортдин мастервилин тIвар къачуна. Гила адахъ алай вацра Грозныйда дзюдодай кьиле фидай СКФО-дин кIвенкIвечивал патал акъажунрани чемпион жедай ният ава. Ахпа рикIе къаст авай лезги хци Казань шегьерда мартдиз самбодай жедай чемпионатдиз гьазурвилер аквада.
Замир вилик квай кесерлу турниррани гъалиб жедайдак чIехи умудар кутазва. Ихьтин лезги хцихъ къуй еке агалкьунар хьурай!
Руслан Керимханов
