Сулейман-Стальский райондин  “Куьредин хабарар” газетдин кьилин редактор, Дагъустан Республикадин культурадин лайихлу работник, РФ-дин журналистрин Союздин член  Асият  Мусаевна  Мирзалиевади  и йикъара  вичин 50 йисан юбилей къейдна. Адаз юбилей райондин кьил Нариман Абдулмуталибова шад гьалара (шикилда) мубаракна.

Асият 1969-йисан 28-январдиз Кьасумхуьрел Муса ва Секинат Мусаеврин хизанда дидедиз хьана. 1981-йисуз ада Кьасумхуьруьн 1-нум­радин юкьван школа, 1993-йисуз Дагосуниверситетдин фи­лологиядин факультет заочнидаказ акьалтIарна.

Вичин зегьметдин рехъ А.Мирзалиевади 1990-йисуз Цмуррин тамам тушир юкьван школада урус чIалан ва литературадин муаллимвиле кIва­­лахунилай башламишна.

1991-йисан апрелдин вацра “Куьредин хабарар” газетдин кьилин редактор Сейфудин Муталибова жегьил муаллим Асиятаз редакциядиз корректорвилин кIвалахал атун теклифна. Им дуьшуьшдин кар тушир. Асията газетдиз ара-ара макъалаяр кхьизвай. Идалайни гъейри, адаз редакция “чара чка” тушир. Адан рагьметлу диде Секината яргъал йисара редакцияда михьивилердайди яз кIвалахнай.

— Гьеле школада кIелзавай йисара, дидедихъ галаз ара-ара зунни редакциядиз къведай, дидедиз куьмекар гудай, столрал алай газетар кIелдай, — лугьузва Асият Мусаевна­ди. — Чидач дидеди кIвалахза­вай­ви­ляй тиртIани, я тахьайтIа, зун кьисметди аниз кIвалахал хкидайвиляй, гьеле гьа вахтунда зи рикIиз редакция чими хьанай. Мадни, гьа йисара редакцияда кIвалахзавай работникар за чи хизандин багърийрай кьадай, газетдиз макъалаяр кхьизвай абурал за гьейранвал ийидай. Гуьгъуьнлай зи стха Таривердидини газетдин редакцияда хейлин йисара отделдин заведующий ва кьилин редактордин заместитель яз кIвалахна. Ина кIва­лахунал къе зани шадвалзава.

Редакциядиз кIвалахал атай сифте йикъарилай А. Мирзалиевади  тежрибалу журналистрилай чешне къачуз, абурун меслятрихъ яб акализ хьана. И кар, гьакIни журналиствилин пешедал рикI хьуни ам “кIва­лахдин гурарай” винелди хкажни аву­на: корректор, корреспондент, культурадин отделдин заведующий, 2016-йисан 1-июлдилай газетдин кьилин редактор.

1931-йисалай акъатзавай газетдин редакторар яз жуьреба-жуьре йисара Мемей Эфендиев, Паша Исаев, МутIагьир Рзаханов, Гьажи Аликберов, Къурбан Мамедов, Саид Алиметов, Жалал Алагьвердиев, Загьидин Къазанбегов, Сейфудин Муталибов хьтин тежрибалу пешекарри,  бажарагълу журналистри кIвалахна. Асият Мусаевнади абурун кар, газетдин хъсан адетар давамзава.

— Общество вилик финин вири де­вирра газет коллективный пропа­гандист, агитатор, тешкилатчи хьана. Райондин экономика, культура, об­ра­зова­ние вилик тухунин, несилриз ах­лакь­дин, марифатдин, зегьметдин, ва­­танпересвилин тербия гунин, мил­ли­ чIал, адетар, халкьдин арада авай дуствал хуьнин, мягькемарунин кардик газетдин коллективди еке пай кутуна, и важиблу кар гилани давамарзава.

Гъилевай йисуз район арадал атайдалай инихъ 90 йис, Дагъустандин халкьдин шаир СтIал Сулейманан 150 йис тамам жезва. Ида чи ви­лик мадни еке везифаяр эцигзава, абур чна кьилизни акъудда, — лугьуз­ва Асият Мусаевнади.

Гьакъисагъ зегьметдай А.Мирзалиевадиз “Дагъустан Республикадин культурадин лайихлу работник” лагьай гьуьрметдин тIвар (2012-йис) ганва. Ам гьакIни Дагъустан Республикадин информациядин ва печатдин министерстводин, райондин администрациядин патай ганвай ва ма­са грамотайрин сагьиб, РФ-дин журналистрин Союздин членни я.

А.Мирзалиевади “Куьредин ярар”, “ЦIийи Кавказ” издательствойра акъуд­навай лезги писателринни шаиррин са шумуд ктабдиз редакторвал ва корректорвал авуна. Райондин дишегьлийрин советдин член яз, ада общественный еке кIвалахни тухузва.

А. Мирзалиевади лугьузвайвал, рикI алай пеше гьевесдивди, бегьерлувилелди кьиле тухунин карда адаз къуват, илгьам гузвайди адан къени, гьуьрметлу хизан я. И кар чнани, газетдин редакциядин коллективдини, аннамишзава. Лап къени къилихдин инсан тир уьмуьрдин юлдаш Вагифа, рухваяр тир Рустамани Камила, ада вичи лугьузвайвал, “къене авай рикI хьтин свас Заринади” ва хтулар тир Амирадини Гьажиди Асият Мусаевнадиз уьмуьрдал, пешедал кьарувал, руьгьдин кIубанвал ва пакадин йикъахъ инанмишвал гузва.

Юбилей мубарак авуналди, заз къелемдин вах Асият Мирзалиевадикай кхьенвай цIарар Низами Генжевидин “…Къадир жечни кьисметдин, Къужахдава вун бахтунин, гьуьрметдин” гафаралди куьтягьиз кIан­зава.

Хазран Кьасумов