Белиж поселокдин 1-нумрадин юкьван школада Дербент райондин школьникрин арада лезги шаиррин эсерар лап хъсандиз кlелунай конкурс кьиле фена. Адан кьилин макьсад лезги чlал халкьдин къатара гегьеншарун, хуьн, бажарагъ авай жаванар жагъурун, акьалтзавай несил хайи чlалал рикl алаз тербияламишун, дидедин чlал кlанарун тир.
Школадин директор Имара Заловади мярекат ачухна, конкурсантриз агалкьунар алхишна, жюридин векилар малумарна: РУО-дин начальникдин заместитель Назира Мирзаева, РУО-дин методцентрадин руководитель Тамила Алиева, РУО-дин кьилин пешекар Зарема Алиева, РД-дин писателрин Сюздин лезги секциядин руководитель,шаир Владик Батманов, шаир,РД-дин лайихлу муаллим, РФ-дин образованидин гьурметлу работник Гъулангерек Ибрагьимова и цlарарин автор.
Ана Белиж поселокдин кьил Р.Гьабибулаева, Лезги муздрамтеатрдин кьилин режиссер, РД-дин халкьдин артист М.Мирзебегова, шаир ва публицист С.Абила, Дербент шегьердин культурадин управленидин кьилин пешекар Г.Шабановади, школайрин директорри, муаллимри ва аялри иштиракна.
Конкурсдин нетижаяр кьазвай арада В.Батманова ва Гъ.Ибрагьимовади шиирар кlелна.
Аялриз къимет гузвай нетижаяр Назира Мирзаевади малумарна, чкаяр и аялри кьуна: 1-чка — Мальвина Азизовади (Агълабрин СОШ), 2-чка — Хадижа Гьуьсейновади (Белиж хуьруьн 2-нумрадин СОШ), 3-чка — Рагната Цмиевади (Хазар хуьруьн СОШ).
Конкурсдилай гуьгъуьниз мярекат “Штул”, “Садвал” ва аялрин кьуьлерин “Кавха” ансамблри манияр лугьуналди ва кьуьлер авуналди давамарна.
Къагьриман Ибрагьимов
