Дагъустандин государстводин халкьдин майишатдин университетда РФ-дин хуьруьн майишатдин министрдин заместитель Максим Увайдован регьбервилик кваз Россиядин хуьруьн майишатдин министерстводин совещание хьана. Ана гьакIни АПК-дин регионрин органрин векилри ва Россельхознадзордин территориальный управленийрин, ветеринариядин ва хуьруьн майишатдин маса ведомствойрин векилри иштиракна. Идан гьакъиндай “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гана.
Мярекатдал СКФО-дин мулкарал эпизоотикадин — гьайванрин арада фад акатдай инфекциядин азаррин жигьетдай авай гьалариз, ветеринариядин электронный шагьадатнамаяр уьмуьрдиз кечирмишунин еришриз ва ветеринариядин идараяр материалралдини техникадалди таъминаруниз, округрин мулкарал эпизоотикадин гьалар хъсанарунин рекьяй жавабдар ксариз ва продукция ишлемишзавай вири девирда адан хатасузвал таъминаруниз талукь месэлаяр веревирдна.
Вичин рахунра Максим Увайдова къейдна хьи, Россиядин Федерацияда алай йисан сифте кьилерилай са жерге субъектрин мулкарал гьайванрик акатдай хаталу азарар пайда хьунихъ ва чукIунихъ галаз алакъалу яз эпизоотикадин гьалар садлагьана пис хьана. И гьалари властдин вири органривай тади гьалдин ва саналди тир гьерекатар истемишзава. Идалайни гъейри, ветеринариядин къуллугъар цIийи къайдада туькIуьрун, субъектрин властрин патай ветеринариядин идараяр лазим тир жуьреда финансламишун, кадрийралди, материалралдини техникадалди таъминарун чарасуз тирди къейдна.
Министрдин заместителди гьакIни къейдна хьи, къецепатаз ракъурзавай продуктрал гьалтайла, Кеферпатан Кавказдин республикайрин мумкинвилер эхиримжи вахтунда хейлин гзаф хьанва. “Мадни, иллаки къецепатаз ракъурзавай малдарвилин продукция патал электронный шагьадатнама кардик кутуна ва и кIвалахдиз мадни виликди рум гана. Амма мадни менфятлудаказ кIвалахун патал ам майишат кьиле тухудай субъектралди, регионралди ахцIур хъувун таъминарун чарасуз я», — къейдна Максим Увайдова.
РД-дин Гьукуматдин Председателдин заместитель — РД-дин хуьруьн майишатдин ва суьрсетдин министр Абдулмуслим Абдулмуслимова гьисабзава хьи, 2018-йисуз Дагъустанда электронный ветеринариядин шагьадатнама уьмуьрдиз кечирмишун патал хейлин кIвалах кьиле тухванва. “И месэлаяр регион патал лугьуз тежедай кьван важиблу я. Идан гьакъиндай Дагъустандин Кьил Владимир Васильева са шумуд сеферда малумарнавай. И кардиз зегьметкешрини къимет ганва. Санлай къачурла, Дагъустандин АПК-дин кар алай терефра 2018-йисуз 124,1 миллиард манатдин кьадарда аваз продукция гьасилнава, къецепатан уьлквейриз ракъурнавай продукциядин кьадар 23 процентдин гзаф хьана”, — къейдна Абдулмуслим Абдулмуслимова.
Хуьруьн майишатдин суьрсетдин министерстводин кьили, гьакIни регионда куьлуь ва чIехи карч алай гьайванрин гьисабни кьунвайдан гьакъиндай лагьана.
Вичин эхиримжи гафуна Максим Увайдова къейд авурвал, чпикай раханвай месэлаяр гьялунин кардиз менфятлу ва ерилу ветеринариядин игьтияжриз къуллугъ авуни, производство вилик фини, малдарвилин продукция хуьни ва гьялуни, маса гуни екез куьмекда.
Веревирд авур месэлайрин гьакъиндай СКФО-дин мулкарал эпизоотикадин жигьетдай гьалар хъсанарун патал тапшуругъар ва меслятар гана.
«Лезги газет»
