Яру дагъди вичин ценерив Россиядин вири пипIерай атанвай дагъларин кукIу­шар муьтIуьгъардайбур нубатдин гъилера кIватIна. Докъузпара районда альпинизмдай Россиядин чемпионат башламиш хьана. Идан гьакъиндай “Лезги газетдиз” райондин администрациядин пресс-къуллугъди хабар гана.

Акъажунрив эгечIуниз талукьарнавай мярекатда РД-дин туризмдин ва халкьдин художественный сеняткарвилерин рекьяй министр Расул Ибрагьимова, РД-дин спортдин министрдин заместитель Зайнал Салаутдинова, Россиядин альпинизмдин федерациядин вице-президент, классический альпинизмдин комиссиядин председатель Александр Пятницина, Ингушетия Республикадин альпинизмдин федерациядин президент Висан Юсупова, Дагъустан Республикадин альпинизмдин федерациядин президент Петр  Лео­нова, Ахцегь райондин администрациядин кьил Осман Абдулкеримова, Докъузпара райондин администрациядин кьил Абдурагьим Алискерова, Сулейман-Стальский райондин администрациядин кьил Нариман Абдулмуталибова, Дербент шегьердин администрациядин, МЧС-дин, спортдин, общественный организацийрин векилри ва маса ксари иштиракна.

Акъажунрив эгечIдалди вилик Докъуз­пара райондин кьил РД-дин Минтуризмдин руководителдихъ галаз санал инвест­про­ект кардик кутун патал чара авунвай чкадиз­ килигна. Абдурагьим Алискерова къейд авурвал, проектдал асаслу яз, Къурушрин хуьруьн патарив гвай майдандал туризмдин база арадал гъида. И объ­ект мугьманар патал тайинарнавай, лазим тир къулайвилер авай саки цIуд кIвале­ри­кай ибарат жеда. Райондин кьили къейд авурвал, ихьтин майдан кардик кутуни райондиз дагъ­лара метлеблудаказ ял ягъиз­ кIанзавай туристар желбдай мумкинвал гуда.

Ахпа альпинизмдай акъажунар ачуху­низ талукьарнавай официальный пай башламиш хьана. Расул Ибрагьимова аль­­пинистар Дагъустандин руководст­водин тIварунихъай тебрикна.

“За Да­гъустандин Кьилин, РД-дин Гьукуматдин Пред­­седателдин тIварунихъай, кьилди жуван патай акъажунрин вири иштиракчияр, судьяяр ва мугьманар  тебрикзава. Заз квехъ виридахъ агалкьунар, дагъдиз агалкьунралди хкаж жедай мумкинвилер хьун кIанзава. Чакай рахайтIа, чун квез цIини, къведай йисузни ина неинки акъажунар кьиле тухун, гьакIни ял ягъун­ патални вири шартIар тешкилиз чалишмиш жеда”, — малумарна РД-дин Минтуризмдин регьберди.

Докъузпара райондин кьил Абдура­гьим­ Алискеровани вири мугьманар, чемпионатдин иштиракчияр хушвилелди тебрикна. Ихьтин проектар кардик кутазвай шартIара, дагъларин кьакьан кукIушриз хкаж хьуналди альпинистри чи чIехи уьлкве ва чи гъве­чIи ватан машгьурзавайди къейдна.

“…Докъузпара район надир район я. ТIебиатди чи ерийриз атIугъай, гьа са вахтунда тикрар техжер хьтин гуьзелвал ­ган­ва­. Сифтени-сифте им дагъларин — чаз муь­­­тIуьгъариз кIанзавай дагъларин гуь-зел­вал я. Четинвилер ва манийвилер  алу­диз кIан хьун — им руьгьдиз мягькем, ви­кIегь ксариз хас кар я. Къе чун гьахьтин ксар акъажунрив эгечIунин шагьидар же­да”, — къейдна А.Алискерова.

Райондин кьили икьван важиблу акъажунар  Докъузпара районда тешкилунай Россиядин Федерациядин спортдин министерстводин, Россиядин Федерациядин туризмдин министерстводин, Дагъустан Республикадин туризмдин ва халкьдин художественный сеняткарвилерин рекьяй­ министерстводин, Дагъустан Республикадин спортдин министерстводин, Россиядин альпинизмдин федерациядин ва Да­гъустан Республикадин альпинизмдин федерациядин руководстводиз сагърай лагьана. Ада ихьтин акъажунар кьиле т­у­хун хъсан адетдиз элкъвенвайди къейдна. Ихьтин серенжемри, четинвилер алу­диз­, ял ягъунал рикI алай хейлин ксарин фикир чи райондал желбзава. Ихьтин акъа­жунри чаз райондин мулкарал туризм вилик тухунин, активнидаказ ял ядай шар­тIар яратмишунин карда куьмекзава.

Государстводин гимндин сесерик кваз Россиядин ва Дагъустандин пайдахар хкажна.

Идалай гуьгъуьниз спортсменриз ва мугьманриз суварин концерт гана. Мярекатдин официальный пай куьтягь хьайидалай гуьгъуьниз Расул Ибрагьимова спортсменрихъ галаз суьгьбетар авуна. Во­ронеждай тир альпинистри чеб хушвилелди кьабулунай гьукумдин векилриз сагърай лагьана. Спортсменри Яру дагъ — им  рагарай, чархарай виниз хкаж хьунин рекьяй акъажунар кьиле тухун патал  лап лугьуз тежер кьван къулай чка тирди къейдна. Ина ихьтин жуьредин серенжемар йи­са кьиляй-кьилди тухуз жеда. Квекай дарвал ава лагьайтIа, мугьманар ва альпинистар кьабулдай чкаяр бес жезвач. И командадин иштиракчиди къейд авурвал, лазим тир шартIар яратмишайтIа,  ина ял ягъиз, альпинизмдал машгъул жез кIанза­вай­бурун кьадар лап артух жеда.

Расул Ибрагьимова мукьвал вах­та­ра мугьманар, туристар патал лазим тир вири шартIар авай кIвалер хкажунив эгечIдай­дан патахъай хабардар авуна.

Къейд ийин, акъажунар 3-февралдилай 16-февралдалди давам жеда. Гьа и вахтунда чемпионатдин иштиракчияр тир 12 команда Яру дагъда кардик кутунвай чпел тIем гъун лап четин акъваззавай мар­шрутрай фин лазим жеда.

Акъажунра Красноярскдай, Санкт-Петербургдай, Самарадай, Новосибирскдай, Нижний Новгороддай ва маса чкайрай атанвай альпинистри иштиракзава.

«Лезги газет»