6-февралдиз Сулейман-Стальский райондин кьил Нариман Абдулмуталибова РД-дин кьилин стипендия къачузвай студенткаяр тир  Курхуьруьн 1-нумрадин мектебда кIелай Шикер Шихбабаевадиз ва Кьасумхуьруьн 1-нумрадин мектебда кIелай Шагьзада Салмановадиз И.Яралиеван мергьяматлувилин «Умуд» фондунин патай шад гьалара чухсагъулдин чарар ва пулдин пишкешар гана. Идакай «Лезги газетдиз» райондин администрациядин пресс-къуллугъди хабар гузва.

КIелунра къазанмишнавай лайихлувилериз килигна ДГУ-дин химиядин факультетдин 5-курсунин студентка Шикер Шихбабаева ва А. Евдокимован тIварунихъ галай Москвадин государстводин медико-стоматологиядин университетдин 4-курсунин студентка Шагьзада Салманова Дагъустан республикадин кьилин стипендийриз лайихлу хьана.

Райондин кьили чешнелудаказ кIелзавай студенткайриз хьанвай агалкьунар тебрикна, гележегдани цIийи макьсадрихъ, цIийи кукIушрихъ агалкьун алхишна.

«Лезги газет»