И йикъара Кьурагь райондин администрациядин заседанийрин залда райондин кьилин заместитель Махач Хариева кIвалахдин рекьяй идарайринни тешкилатрин жавабдар къуллугъчийрихъ галаз нубатдин совещание кьиле тухвана. Идакай «Лезги газетдиз» райондин администрациядин пресс-къуллугъди хабар гузва.

М.Хариева «Камаздин» шоферди къайдадикай хкудай райцентрадин газдин турба туькIуьр хъувунин гьалдикай ихтилатна. Ада и карда куьмек гайи Кьурагь, Хив, Сулейман-Стальский районрин газдин къуллугъдин работникриз чухсагъул малумарна.

Образованидин отделдин начальник Р.Катибова образованидин идарайра чими ийидай тадаракар гуьнгуьна хтунвайдакай, райондин мектебриз цIийи ктабар пай хъувуникай малуматар раижна.

Хуьруьн майишатдин ва чилерихъ галаз алакъалу отделдин начальникдин везифаяр вахтуналди тамамарзавай А.Фаталиева хуьруьн майишат вилик тухунин месэлайриз талукь яз республикада кьиле фейи совещанидин нетижайрикай суьгьбетна. Ада малумарайвал, Кьурагь район гуьгъуьна амукьнавай районрин жергедик квач, амма жегьил фермерри хуьруьн майишат вилик тухунин рекьяй грантар къачунин кIвалахра иштиракзавач.

Чпин везифайрик акатзавай кIвалахрин эхиримжи нетижайрикай райондин культурадин, информациядин ва печатдин центрадин начальник Абдулкъадир Будаева, информацийрин технологийрин ва печатдин центрадин начальник Жаврудин Халикьова, ЦРБ-дин кьилин духтур Омар Гьададова, финансрин отделдин начальник Бахтияр Ибрагьимова ва масабуру ихтилатна.

Эхирдай М.Хариева гьял хъувуна кIани бязи месэлайрин гьакъиндай жавабдар ксариз талукь тир тапшуругъар гана.

«Лезги газет»