И йикъара чав чIулав хабар агакьна: яргъал чIугун тавур залан азардикди тIвар-ван авай муаллим-математик, ДГПУ-дин математикадин факультетдин доцент, РД-дин лайихлу муаллим, РФ-дин образованидин гьуьрметлу работник, къени хизандин кайвани, балайрин диде ва баде Мафи Назировна Эсетова-Юзбегова рагьметдиз фена. Ам чидай вирибуру дериндай яс чIугвазва, хизанриз, мукьва-кьилийриз, багърийриз сабурар гузва.
М.Н.Эсетова-Юзбегова 1936-йисуз Ахцегь райондин Луткунрин хуьре дидедиз хьана, Ахцегьа 1-нумрадин юкьван школа, Махачкъалада яру дипломдалди Дагъви рушарин институтдин (гила ДГПУ) физикадинни математикадин факультет акьалтIарна.
Студент йисара ада, амай гзаф рушарини гадайри хьиз, уьлкведин чIурухъан чилер къарагъарунин женгера иштиракна (1957-1958-йисар).
Вуз акьлатIарна, жегьил муаллимди вичин итим, жегьил духтур Эсетов Азединахъ галаз санал Мегьарамдхуьруьн райондин Филерин, ахпа Мегьарамдхуьруьн мектебра, итимди больницайра кIвалахна.
Азедин Мурадович аспирантурадиз гьахьайдалай кьулухъни Мафи Назировнади, вичин куьлуь аяларни хуьз, Мегьарамдхуьре математикадин муаллимвилин пеше давамарна.
1968-йисуз хизан Махачкъаладиз хтана. Мафи Назировнадиз гьа вичи куьтягьай вуздиз кIвалахал атун теклифна. Гьа икI уьмуьрдин эхиримжи йикъалди зигьиндинни акьулдин вири алакьунар ада вузда жегьилриз математикадай дерин чирвилер, ахлакьдин виниз тир тербия гуниз, марифатдин михьи чешнеяр машгьур авуниз бахшна. Ада тарс гайи студентрикай уьлкведа тIвар-ван авай алимар, бажарагълу руководителар, зегьметдин тешкилатчияр, лап хъсан муаллимар хьанва. Адан гъилик кIелай, чирвал ва тербия къачур муаллим авачир мектеб чи республикада бажагьат гьалтда.
Мафи Назировнади яргъал йисара школайрин метаматикадин муаллимрин ва методистрин чирвилер хкаждай курсарни кьиле тухузвай. И курсариз лагьайтIа, Кеферпатан Кавказдин вири республикайрай пешекарар къвезвай.
Математика школада чирунин методикадай ада кхьенвай хейлин макъалаяр, илимдин жуьреба-жуьре мярекатрал кIелай лекцияр, авур докладар “Математика в школе” журналда, маса изданийра чапнава. Студентриз, иллаки рушариз ам хайи диде хьиз, муаллимриз, алимриз хайи вах хьиз тир. Гьавиляй адаз чидай вирибуру гьуьрметдивди “Лезги диде, баде” лугьузвай, жедай кьван хъсанвилер хъийиз алахъдай.
Мафи Назировна “Лезги газет” патални амадаг, адал ашукь, ам кхьиник ва машгьур авуник лайихлу пай кутур ксарикайни сад тир. Гьар ЦIийи йисан нумрада ам чна тебрикзавай.
Мафи Назировнади вичин итим, ДГМУ-дин доцент, илимрин кандидат, РД-дин халкьдин духтур Азедин Мурадовичахъ галаз санал гьуьрметлу хизан арадал гъанва. Ана илимрин 2 доктор, 2 кандидат, лап хъсан духтурарни муаллимар чIехи хьанва. Хтулрини птулри а ирс давамарзава.
Вилик мадни гзаф мурадар квай. Амма ажалдиз я мажал, я инсаф чидач.
Чна Мафи Назировнадин уьмуьрдин юлдаш, чи чIехи дуст Азедин Мурадовичаз, рухваяр тир Мурадазни Фаргьадаз, мукьва-кьилийриз, багърийриз башсагълугъвал гузва.
Мафи Назировна Эсетовадин-Юзбеговадин экуь къамат садрани чи рикIелай алатдач.
«Лезги газетдин» редакциядин коллектив
