Россиядин лайихлу артист, Лезгийрин СтIал Сулейманан тIварунихъ галай госмуздрамтеатрдин актёр Гьабибов Абдуллагь ­Тажибан хва  зурба бажарагъ авай сегьнедин устад я лагьайтIа, ягъалмиш жедач. Адан пешекарвилин, устадвилин,  инсанвилин виниз тир ерияр виридаз малум я. Гьавиляй хайи Лезги театрдин коллективдиз Абдуллагь Гьабибов чпин кьилин винизвал тирди чизва, адак екез умудни кутазва.

Хъсан крарик кьил кутадай, дерин чирвилер авай актёрдиз хайи театрдин тарих хъсандиз чир хьунихъ галаз сад хьиз, ада театрдин культура хуьнин, виликди тухунин рекьени еке зегьмет чIугвазва. Абдуллагь Гьабибова режиссёрвилин везифаярни кьилиз акъудзава. Жуьреба- жуьре мярекатриз сегьнеяр гьазурзава, пьесаяр таржума ийизва, манийриз чIалар, мугъамар кхьизва, вичин ширин ванцелди тамашачияр шадарзава. Гзаф месэлайрин гъавурда авай гьуьрметлу насигьатчи мукьвал-мукьвал Дербент  шегьердин мектебризни мугьман жезва. Ам анра кьиле тухузвай лезги чIалан конкурсрин жюридин председателни я.

Икьван крар кьилиз акъудиз гьикI алакьзава лагьана суал гайитIа, жаваб ихьтинди я: еке гьевесди, гъвечIи чIавалай искусстводал рикI хьуни адаз къуват гузва.

— Зи буба Тажиба, хуьруьн школада муаллимвални ийиз, хъсандиз тарни ядай. ­ЧIе­хи стха Гьабиба чIагъан ягъиз, за манияр ­лугьудай, — рикIел хкизва Абдуллагьа. — Амма заз  чи  Чахчарин-Къаз­майрал  Лезги  теа­трдин артистар атайла  ви­­­ри­далайни  гзаф шад ­жедай. Зун та­маша къалурдалди абурун патав фидай, ихтилатар ийидай. Гьа икI зун пешекар артистар тир Мурадхан ва Шемси Къухмазоврихъ, Къумбай ва Зуьгьре Рамазановрихъ, Зуьлейха Давудовадихъ ва са гзаф маса бажарагълу артистрихъ галаз таниш хьанай.

Мектеб куьтягьай жегьил  гьи пеше хкяда лугьудай суалди кIеве тунач. 1964-йисуз Абдуллагь Гьабибов  Дер­бентдин культпросветучилищедин актёрвилин от­де­ленидиз гьахьна. Адан бахтуни гъана.­ А.Гьабибова рикIел хкизвайвал, артиствилин пеше­дай тарсар гуз, учи­ли­ще­диз Рос­сия­дин ла­йихлу артист Ба­гъиш Айдаев атанай. » Ам зи кьисметда актёрвилин пешедикай заз хъсан чирвилер гайи сифте муаллим хьана. Гуьгъуьнлай зи еке ашкъи, гьевес акурла, и чIехи касди заз Лезги театрдиз атун теклифна. Гьелбетда, за теклиф шадвилелди кьабулнай», — суьгьбетзава ада.

Абдуллагь Тажибович Лезги театрди цуьк акъуднавай 70-йисара вичин уьмуьр сегьнедихъ галаз алакъа авур актёррикай сад я.

Багъиш Айдаева Абдуллагь Гьабибов бажарагълу актёр хьун патал лап еке зегьмет чIугуна, ам лап хъсандиз лигимарна. Зурба режиссёрдихъ галаз санал кIвалахай йисар А.Гьабибова вичин уьмуьрда виридалайни хушбахтлубур яз гьисабзава. Багъиш Ай­даеван экуь къамат актерди гьамиша рикIе хуьзва.

Амма и зурба режиссёрди гайи тар­сарал, меслятрал артист архайин хьана ­акъвазнач. Ам  гьа са вахтунда, вичихъ галаз санал кIвалахай Лезги театрдин чIехи агъсакъалар тир Мурадхан ва Шемси Къухмазовар, Седредин Велиханов, Дурия Рагьи­мова, Абдурашид Магьсудов, Абдул­къадир Сайдумов ва ма­са актёррин устад­ви­лиз­ни фи­кир гуз, чин тийи­дай крар абу­­ру­вайни чириз алахъ­­­дай.

Гьа икI чIехи кукIушрихъ ялзавай жегьил актёр, вичин чирвилер хкажиз, Краснодардин куль­турадин институтдин режиссёрвилин факультетдиз гьахьна. ЧIу­гур зегьметди бегьерни гана. Ингье атана яхцIурни цIуд йисалайни гзаф вахт хьанва ада Лезги театрда кIва­лахиз, сегьнедилай вичин зурба устадвал къалуриз, тамашачияр гьейранариз…

Алатнавай йисара Абдуллагь Гьабибоваз  цIудралди багьа пишкешар, грамотаяр, 1986-йисуз Дагъустандин лайихлу, 1995-йисуз Дагъустандин халкьдин, 2005-йисуз Россиядин лайихлу артиствилин гьуьрметдин тIварар гана.

Зи фикирдалди, Абдуллагь Тажибович мадни  чIехи тIварариз лайихлу актёр я. ГьикI лагьайтIа, адан гьар са югъ жуьреба-жуьре везифайрив ацIанва. Театрдин даях ва ­дамах тир и регьимлу, сабурлу актёр санал акъвазнавач: ам гагь сегьнеда репетицияда жеда, гагь вичин камаллу меслятралди ­жегьилриз дуьз рехъ къалуриз алахънаваз аквада.  Са гафуналди, Гьабибова гьа сифтедай хьиз, жегьилвилин ашкъидалди ­вичин  кIвалах  къенин  юкъузни  давамарзава.

Вири санлай ада сегьнеда 160-дав агакьна къаматар яратмишнава. Сегьнедин вири жанрайра ада вичин устадвал вини дере­жада аваз къалурзава. Абдуллагьа лезги халкьдин­ саки вири къагьриманрин ва руьгьдин дестекрин — Кьуьчхуьр Саидан, Етим Эминан, Алкьвадар Гьасан эфендидин, Ярагъ Мегьамедан, Касбубадин, КIири Бубадин ва масабурун къаматрал чан гъанва. Дагъустандин халкьдин шаир СтIал Сулейманан къаматда ам къанни цIуд сеферда къугъвана. Гьа и къаматда аваз Абдуллагь Гьабибова Да­гъустандин тIвар Моск­вада, Парижда, Баку­да виниз хкажна.

А.Гьабибов  къазанмишнавай агалкьунрал рази хьана акъваззавач,  цIийи мумкинвилер жагъуриз, яратмишунрин рехъ мадни гегьеншариз алахъзава.

Гьикьван алахъайтIани, и аламатдин ­бажарагъ авай актёрдикай ва адан ярат­мишунрикай вири кхьиз хьун мумкин туш. Са гафуналди, ада Лезги театрдин кIвалах вилик тухунин карда екез чалишмишвал­зава.

Лезги театрдин дамах, тамашачийрин рикI алай бажарагълу актёрди и йикъара вичин 70 йисан юбилей къаршиламишна.

Лезги  театрдин коллективди Абдуллагь Гьабибовахъ яргъал йисарин сагълам уьмуьр, лезги халкьдин руьгь хкажунин, шадарунин карда мадни чIехи агалкьунар, уьмуьрда шадвилер хьун алхишзава.

Эминат Загьирбегова