Ярар тергнавай азар яз гьисабзавайди тир. Амма эхиримжи кьве йисан нетижайри чун маса фикиррал гъизва: тергиз хьанвач. Ам мадни заландиз хтанва. РД-да авай гигиенадин ва эпидемиологиядин центрадин делилралди, ярар акатуниз талукь яз республикада кьулан дережадилай винизбур тир гьалар Къумторкъала, Леваша, Тарумовский, Сергокъала районра ва Избербаш шегьерда арадал атанва.
Виридалайни гзаф и азардикди начагъбур (59,3%) Махачкъалада ава. Ина ярар акатнавай 150-далай виниз дуьшуьшар малум хьанва. Ихьтин гьалари Дагъустандин кьиле авай ксарик ва республикадин здравоохраненидин министерстводик екез къалабулух кутунва.
Ярарихъ галаз алакъалу яз республикада арадал атанвай гьалар и йикъара РД — дин Гьукуматдин Председателдин Сад лагьай заместитель Анатолий Къарибован регьбервилик кваз кьиле фейи совещанидал веревирдна.
РД-дин Кьил В.Васильева гьалариз баян гана. Ада жегьил диде-бубайри, и ва я маса себебрикай даях кьаз, аялриз азарриз акси рапар ягъуникай кьил къакъудзавайди къейдна. “…Къенин юкъуз чун ярари кьил хкажнавайдакай рахазва. И месэла неинки здравоохраненидин, гьакI образованидин ва культурадин министерствойризни талукьди я… Чна ихьтин хаталу азаррикай агьалияр хвена кIанда”,- лагьана ада.
“Рапар ягъуникай кьил къакъудзавай диде-бубайри чпин аялар хаталувилик кутазва. Ярар гьавадик кваз къведай, фад чкIидай лап агъур азар я. Адан лишанар акунмазди, гьасятда духтуррин куьмекдикай менфят къачу!” — эвер гузва пешекарри.
Рагнеда Рамалданова
