Дагъустандин здравоохраненидин министерстводин сайтда хабар ганвайвал, 2019-йисуз виниз тир технологийрин медицинадин куьмекдин кьадар (ВМП) 20 процентдин артухарда. ЦIинин йисуз алай аямдин технологийрикай менфят къачуналди 7 агъзурдалай виниз операцияр кьиле тухун пландик кутунва. 2018-йисуз лагьайтIа, четин операцияр авурбурун ва сагъламардай серенжемар агакьай азарлуйрин кьадар 5 агъзурдалай виниз тушир.
Къейд авун лазим я хьи, ихтилат физвайди неинки четин операцийрин кьадар артухаруникай, гьакIни икьван вахтунда республикада кьиле тухун тавунвай жуьрединбурни чкадал тамамардай мумкинвал яратмишуникай я. Республикада чIехибурук акатзавай вири больницайра кьетIен жуьредин цIийи операцияр кьиле тухун пландик кутунва.
“Виниз тир технологийрин медицинадин куьмек вилик тухун кьилин месэлайрикай сад я. Алай аямдин сагъламардай къайдаяр уьмуьрдиз кечирмишуни республикадин агьалийриз виниз тир технологийрин ерилу куьмек чкадал, Дагъустандилай къеце патаз фин тавуна, къачудай мумкинвал гузва”, — къейднава РД-дин здравоохраненидин министр Жамалудин Гьажиибрагьимова.
РикIел хкин: ВМП — им залан ва кьериз гьалтзавай азаррикди начагъ инсанриз илимдин ва техникадин эхиримжи агалкьунрин бинедаллаз виниз тир технологийрикай менфят къачуналди куьмек гун я. ВМП патал такьатар федеральный бюджетдай ва ФОМС-дай (Фонд обязательного медицинского страхования) чара ийизва.
Виниз тир технологийрин медицинадин куьмек ишлемишуналди Дагъустанда виридалайни гзаф операцияр кьиле тухузвайбур травматологар я. Гзаф операцияр рикIинни дамаррин хирургиядайни кьиле тухузва. Республикадин 4 больницада алай аямдин ангиографический багьа тадаракар эцигнава. Абуру рикIел ва дамаррал коронарография, стентирование ва маса за-лан операцияр кьиле тухудай мумкинвал гузва. Нейрохирургияни активнидаказ вилик физва. ВМП-дикай республикада акушерстводин ва гинекологиядин, онкологиядин, урологиядин, офтальмологиядин ва амай хилерани менфят къачузва.
Къенин юкъуз Дагъустанда виниз тир технологийрин медицинадин куьмек 15 идарада къачуз жезва. Абурук РКБ, ДРКБ, республикадин ортопедо-травматологиядин центр, Дагъустандин кардиологиядин ва рикIинни дамаррин хирургиядин центр, республикадин онкологиядин центр, Махачкъала шегьердин 1-нумрадин больница ва масабур акатзава.
Рагнеда Рамалданова
