Ахцегь райадминистрациядин залда райондин активдин нубатдин совещание хьана. “Ахцегь район” муниципалитетдин кьил Осман Абдулкеримова лагана.

— Гьуьрметлу юлдашар, эвелимжи ну­батда, лезгийрин игитвилин “Шарвили” эпосдин сувар чалай куь куьмекдалди вини дережадин тешкиллувал аваз кьиле тухуз алакьна, сагърай! Мугьманриз къадим Ахцегь шегьердал абур хк­везвайди, и четин девирда яшайишдинни экономикадин ва культурадин хилера хъсанвилихъ дегишвилер жезвайди акуна. Гьелбетда, и агалкьунрик чи ватандаш карчийрин зегьметдни пайни. Кьвед лагьайди, чи вилик райцентр хъвадай целди таъминарунни везифа ква. Кьилин чешмейра бес кьадарда яд ава­тIани, ам вирибуруз бес жезвач. Парабуру, чпиз яд хьайила къуншидикай фикир тийиз, хъвадай целди салар дигизва, машинар чуьхуьзва. И къайдасузвилерал эхир эцигун патал чна магистральный цин турбадик ихтиярсуздаказ кутунвай кьван кранар атIузва. Къведай йисан 1-январдилай къуватда гьатзавай РФ-дин Законди истемишзавайвал, инсанри яд ишлемишунай махсус икьрар кутIунун ва цин кранрал счётчикар эцигун лазим я.

Налогар кIватIунин ва чилерни ­капитальный эцигунар  актуализиро­ватунин месэладай пешекар Азади Моллалиева малумарайвал, исятда санлай районди налогрин пландин тапшуру­гъар­ эменнидай 91,5 процентдин, чилин ­налогдай 77 процентдин ­тамамарнава. Капитальный эцигунар ва чилин участокар ак­туа­­лизирова­тунин планар, талукь тирвал, гьелелиг 58% ва 52%-дин ацIурнава.

Райадминистрациядин кьилин заместитель Алмас Шуаева вичин рахунра райондин образованидин идарайрин уставрик дегишвилер кухтун лазим тирдакай лагьана. “20-июлдиз кьиле тухвай ахтармишунри къалурайвал, чи образованидин идарайра (31-кай 20 мектебар я) кIвалах эцигнавай тегьер РФ-дин образованидин гьакъиндай закондив кьазвач. Октябрдин вацралди вири руководителри менедж­ментдай курсар кIел хъувун ва аттестацийра иштиракун лазим я”, — лагьана ада.

Муниципалитетдин умуми отделдин начальник Алимирза Османова залда авайбурун фикир районэгьлияр государстводи ийизвай къуллугърин порталда вахтунда регистрация авунин, СП-рин кьилери райадминистрациядин официальный сайтда малуматар гьакI СП-рин уставарни закондив кьадайвал къайдадиз хкунин ва чкайрал халкьдин арзайриз вахтунда килигунин месэлайрал желбна.

Эхирдай Ахцегь муниципалдитетдин регьбер Осман Абдулкеримова совещанидал веревирд авур вири и месэлайрай СП-рин кьилеризни идарайринни карханайрин руководителриз талукь тир тапшуругъар гана.

Дашдемир Шерифалиев