И йикъара Герейханован хуьруьн библиотекада шаир Зумрият Жабраиловадин 80 йис тамам хьунихъ галаз алакъалу яз ам рикIел хкуниз талукьарнавай мярекат кьиле фена.
Аниз теклифнавай ярар-дустар, мукьва-кьилияр, са жерге шаирар, кьиле Раидин Османован тIварунихъ галай юкьван школадин директор Мадина Гьажимурадова аваз, муаллимар ва 8-“а” классдин аялар атанвай. Мярекат библиотекадин заведующий Эльза Рустамовади тебрикдин сифте гаф лугьуналди ачухна.
— Гьуьрметлу мугьманар ва хуьруьнвияр, — лагьана ада, — къенин мярекат Россиядин писателрин Союздин член Зумрият Жабраиловадин 80 йис тамам хьуниз ва ам рикIел хкуниз талукьарнавайди я.
Ада шаирдин уьмуьрдикай ва яратмишунрикай гегьеншдиз суьгьбетна.
8-“а” классдин аялри шаир Зумрията кхьенвай шиирар хуралай кIелна. Чи бажарагълу шаир Сажидин Саидгьасанова Зумрият Жабраиловадин шииррикай, акъуднавай ктабрикай вичин фикирар лагьана.
Шаир ва журналист Абидин Камилова вич Зумрият Жабраиловадин эсеррихъ галаз “Куьредин хабарар” газетдай таниш хьайиди рикIел хкана. Зумриятан хейлин шиирар манийриз элкъвенвайди, чи мехъеррик, шад межлисрал манидарри тамамарзавайдини къейдна ва вичи шаирдиз бахшнавай са шиирни кIелна.
Гаф Дербент шегьердин культурадин отделдин начальник Гуьлпери Шабановадиз гана. Ада рагьметлудан гьакъиндай хуш келимаяр лагьана ва шаирдин бязи эсерар кIелна.
И цIарарин авторди регьметлудан уьмуьрдикай ва яратмишунрикай суьгьбетна, адаз бахшнавай вичин “Илгьамдин рекье” шиирни кIелна.
Дагъустандин халкьдин артистка Фаризат Зейналовади тамамарай шаирдин чIалариз кхьенвай “Чан диде” мани вирида гурлу капар ягъуналди кьабулна.
Мярекатда иштиракай Манафова Гьуьруьди, Исабегов Фазира, рушар тир Жарулаева Эмилияди ва Османова Наидади З. Жабраиловадин тIварцIихъ хуш гафар лагьана.
Библиотекада З.Жабраиловадин шикилрин стенд ва адан ктабрин выставкани ачухнавай.
Вадим Жамалдинов
