РФ-дин Президент Владимир Путинан къарардалди алукьнавай 2019-йис Россияда театррин Йис яз малумарнава. И месэла вилик акъудунин себеб театрдин искусство уьлкведин агьалийрин гегьенш къатарин тIем акакьдайди ийиз алахъун, театрдин образованидин месэлайрал фикир желб авун я.
Талукь яз, «Лезги газетдини» милли искусство раиж авунин, и хиле арадал атанвай четин месэлаяр ачухарунин месэлайрихъ галаз алакъалу яз конкурс малумарзава. Пуд чкадикай ибарат тир и конкурсдин премийрин кьадар, виликдай хьиз амукьда: 3000, 2000, 1000 манат.
Алатай йисара хьиз, чна юмординни сатирадин куьруь жанрайрин “ИкIни жеда кьван” ва уьмуьрдин рехнеяр арадай акъудиз куьмек гузвай “Хъсан шикил” конкурсарни давамарзава. И конкурсра гъалиб хьайибуруз гьардаз 1000 манат премия ва дипломар гуда.
“Гьевесламишдай премия” — 1000 манат ва диплом — са шумуд касдивай къачуз жеда. И кар патал герекди анжах хайи газетдин чинал жуьреба-жуьре хци месэлайрай кьил-кьилел алай макъалаяр гъун я.
Мад са конкурс — “Баян галай карикатура” — хци зигьин ва шикилар ядай бажарагъ авай ксариз газетдин чинал чка гун патал малумарзава. И конкурсдин премия 1500 манатдиз барабар я.
Идалайни гъейри, литературадихъ, чIалан къешенгвилихъ галаз алакъалу, жаванрин ва жегьилрин арада бажарагълубур хкягъунин мураддалди малумарнавай пуд премияни къуватда ама:
Сад лагьайди: виридалайни хъсан гьикаядин эсер (кьадар вини кьил пуд чарчелай артух тушиз, А4 форматдин чар, 14 кегль, 1,5 интервал). И конкурсда чпин яшар 40 йисалай виниз туширбурувай иштиракиз жеда.
Кьвед лагьайди: Дагъустандин вузрани колледжра кIелзавай лезги студентрин арада «Виридалайни хъсан очерк» кхьинай (кьадар вини кьил пуд чарчелай артух тушиз, А4 форматдин чар, 14 кегль, 1,5 интервал). Тема ачухди я.
Пуд лагьайди: мектебра кIелзавай аялрин арада “Виридалайни хъсан шиир” кхьинай. Тема ачухди я. И конкурс СтIал Сулейманан юбилейдихъ галаз алакъалуди я.
Конкурсрин гъалибчийрин агалкьунар пулдин премийралди (1-чка — 3000, 2-чка — 2000 ва 3-чка — 1000 манат) ва «Лезги газетдин» дипломралди лишанламишда.
РикIел хкин: конкурсдиз ракъурзавай макъалаяр басма авунвай кьуд чарчелай чIехибур хьун лазим туш. Макъалайрин кьилел гьи конкурсдиз ятIа кхьин чарасуз я.
Эхирдайни “Лезги газетдихъ” галаз алакъа хуьзвай, чаз кхьизвай гьар са касдиз мад сеферда сагърай лугьуз кIанзава. Квехъ алукьнавай йисуз анжах къени крар, хуш хабарар ва пешеда агалкьунар хьурай. Чна куь макъалаяр, очеркар, хъсан шиирарни гьикаяяр, мажараяр, хабарар вилив хуьзва!
«Лезги газет»
