Гьар йисан сифте йикъара, пешекар суварин вилик “Лезги газетдин” редакциядиз милли журналистика гужлу авуник, хайи чIал хуьник кьетIен пай кутурбур, газетдихъ галаз сих алакъа хвейибур къейд авун, хъсан макъалайрин авторар хкягъун, алатнавай йисуз малумарай конкурсрин нетижаяр кьун адетдин кар хьанва.
РикIел хкин, “Лезги газетдин” сад лагьай редактор, фольклорист, литератор, чIехи алим ва общественный деятель Гьажибег Гьажибегован тIварунихъ галай премия — 10 000 манат — милли журналистика, литература, илим вилик тухунин кардик лайихлу пай кутунай гузва.
ИкI, редколлегиядин сад тир къарардалди милли публицистикадин бине кутур алимдин тIварунихъ галай премиядиз гила кьвед лагьай сеферда бажарагълу шаир, са кьадар ктабрин автор, «Лезги газетдин» литературадин отделдин редактор Мердали Жалилов лайихлу хьанва. Алатай йисуз чапдай акъатнавай адан шиирралди кхьенвай «Артур» ва “Мешебигидин мани” ктабра кьегьал рухваяр тир Артур Бабаеван ва Зейнудин Батманован жанлу къаматар ачухарнава.
Лезгийрин машгьур лингвист, филологиядин илимрин доктор, кавказовед, РАН-дин ДНЦ-дин ИЯЛИ-дин бине кутур алимрикай сад, чи халкь паталди вичин метлеб садрани квахь тийидай ва вичиз тешпигь авачир урус чIаланни лезги чIалан таржумадинни баянрин (переводно-толковый) зурба словарь (35 агъзур гаф ава) багъишай Мегьамед Гьажиеван тIварунихъ галай премия — 5000 манат — лезги чIал хуьник, чируник, ахтармишуник, девлетлу авуник пай кутурбуруз гузва.
И премия редколлегиядин къарардалди РД-дин лайихлу муаллим, шаир А.Ашурагъаеваз (Хив райондин ЦIийи Фригъ) гун къарардиз къачунва. Ада хайи чIал ва литература аялриз кIан хьун ва чирун, а чIалал фикирун ва художественный эсерар теснифун патал лап важиблу кIвалах тухузва.
2018-йис Россияда волонтеррин, яни гуьгьуьллудаказ, чпин хушуналди хъсан крар ийизвабурун Йис яз малумарнай. Гьа и фикирдал алаз, яни михьи рикIелди куьмекар гунин, муракабди, четинди тир и девирда патарив гвай ксарин къайгъударвал авунин ва икI мад маса месэлайриз талукь яз, «Лезги газетдин» редакциядини, адет хьанвайвал, махсус конкурс малумарнай. Пуд чкадикай ибарат тир и конкурсда 1-премия — 3000 манат — «ЛГ»-дин яшайишдин отделдин редактор Рагнеда Рамалдановади лайихлудаказ къазанмишнава.
2-премиядиз -2000 манат — “Лезги газетдин” политикадин отделдин редактор Нариман Ибрагьимов лайихлу хьана.
3-премия — 1000 манат — Докъузпара райондин Къалажугърин хуьруьн школадин муаллим, “Лезги газетдин” мухбир Куругъли Ферзалиеваз гун къарардиз къачуна. Газет кIелзавайбуруз ада уьлкведин гьар жуьре пипIера яшамиш жезвай ва, анра ватанэгьлийриз жуьреба-жуьре куьмекар гуналди, хайи халкьдин лайихлу векилар яз машгьур хьанвай лезги рухвайрикай ва рушарикай кхьизвай макъалаяр иллаки бегенмиш хьанва.
Чна гьар йисуз давамарзавай «Хъсан шикил» (премия — 1000 манат) конкурсда “Лезги газет” кIелзавайбуруз фадлай таниш чи амадаг, тежрибалу журналист Абдулафис Исмаилован «Рекьимир, цIегь — гатфар къведа» макъаладихъ галай шикил гъалиб хьанва. Республикадин метлеб авай, михьиз барбатI хьанвай “Ново-Гапцах-Ялама” шегьре рехъ авай гьалдал фикир желбзавай шикилри, дугъриданни, газет кIелзавайбуруз екез таъсирна.
«ИкIни жеда кьван!» конкурсдин гъалибчи (премия — 1000 манат) и сеферда Рутул райондин Хъуьлуьдрин хуьряй тир чи мухбир Саид-Агьмед Абдурашидов хьанва. Ада газетдиз ракъурай куьруь мажараяр, хкетар дерин манадинбур, таъсирдайбур тирди газет кIелзавайбуруз фадлай чизва.
Алатай йисуз чна жегьил несилар хайи чIалал ва литературадал желбунин ва абурун арада бажарагълубур тайинарунин мураддалди цIийи мад са шумуд конкурс малумарнай.
ИкI, кардик кутур “Гьевесламишдай премия” — 1000 манат ва диплом — «Лезги газетдиз» яшайишдин месэлайрай са шумуд макъала рекье тур Умрият Рагьимовадиз гудайвал хьанва.
Дагъустандин вузрани колледжра кIелзавай лезги студентрин арада малумарнавай “Виридалайни хъсан очерк” кхьинай конкурсда — 2000 манат ва диплом — Аладаш хуьряй тир ДГУ-дин студентка Амина Шагьпазова гъалиб хьанва. Ада вичин хайи ерийрикай тир Цилингрин хуьруькай кхьей макъалади кIелзавайбурун фикир квахьзавай хуьрерин, милли адетрин, сенятрин месэлайрал желбзава.
Мектебра кIелзавай аялрин арада малумарай “Виридалайни хъсан шиир” конкурс — 1000 манат — Етим Эминан юбилейдихъ галаз алакъалуди тир. Шадвилелди къейд ийиз кIанзава хьи, и конкурсда чахъ гъалибчияр кьвед хьана. Еке бажарагъдивди, рикIин дериндай къвезвай гьиссералди кхьенвай сад лагьай шиирдин — «Эмин буба» — автор Хив райондин Цналрин хуьруьн юкьван школадин 7-классдин ученик Гьамзат Велибегов (№48,11-чин) я. Чаз таъсир авур кьвед лагьай шиир — «ЧIехи буба» — Эминхуьруьн юкьван школадин 7-классдин ученик Имирхан Айдаеванди (№8,11-чин) я. Баркалла чи жаван шаирриз!
Конкурсра гъалиб хьанвай чи юлдашриз редакциядин коллективди и агалкьунар рикIин сидкьидай мубаракзава. Премияр ва дипломар “Лезги газетдин” редакцияда вахкуда.
«Лезги газет»
