Алатай йисан эхирра Махачкъалада, “Европа” тIвар алай межлисрин залда, ДЦДОДИ-ди (Дагестанский центр дистанционного обучения детей-инвалидов) “Михьи рикI” фондунихъ галаз санал, “Руьгьдиз викIегьбур” лишандик кваз, еке мярекат кьиле тухвана. Ана республикадин саки вири пипIерай 400-далай виниз набут аялри иштиракна.
Ихьтин мярекат кьиле тухуз са шумуд йис я. Ана аялриз чпиз-чеб аквазва (аялри скайпдай чирвилер къачузва), абур муаллимрихъ галаз гуьруьшмиш жезва, аялрин руьгь хкажзава.
ЦIийи йисан сувариз талукьарнавай мярекатдин программадик театрдин тамашайрай чIукар, машгьур артистрин манияр, кьуьлер, аниматоррин тамашаяр квай. Аялри кьуьлер авуна, манияр лагьана, шиирар кIелна. Абурун шадвилихъ кьадар авачир. И кар акур диде-бубайри мярекатдин тешкилатчийриз рикIин сидкьидай чухсагъул лагьана.
ЦIийи йисан сувар аялриз РЦДОДИ-дин директор Гьажимурад Усманилаева, республикадин образованидин ва илимдин министерстводин отделдин начальник Жамал Атаева, Дагъустандин гьукуматдин А.Тахо-Годидин тIварунихъ галай музейдин директор Пахрудин Мегьамедова, “Михьи рикI” фондунин векилри, журналистри, муаллимри ва атанвай маса мугьманрини тебрикна.
Мярекат тешкилуник къуьн кутурбуруз рикIин сидкьидай сагърай лагьана, и жуьредин мярекатар инвалид аялар патал мадни жедайвилин умудлувал къалурна.
Ира Шихвеледова
