ЦIийи йисан вилик квай йикъара Кьасумхуьрел Лезгийрин СтIал Сулейманан тIварунихъ галай государстводин музыкадинни драмадин театрдин артистар мугьман хьана. Абуру “Шиирралди Дагъустандин тариф авурбур” фестиваль-конкурсдин сергьятра аваз Ибрагьим Гьуьсейнован “Етим Эмин” трагедиядай Дагъустандин халкьдин артист, театрдин кьилин режиссер Мирзебег Мирзебегова сегьнеламишнавай тамаша къалурна.
Райондин культурадин дворецдин чIехи залда къалурай тамашадиз килигиз неинки райцентрадин, гьакIни саки вири хуьрерайни цIудралди инсанар, райондин руководителар атанвай.
Сифте сегьнедиз райондин администрациядин кьилин 1-заместитель Лацис Оружев ва театрдин кьилин режиссер Мирзебег Мирзебегов экъечIна. Л.Оружев Эминан йисан сергьятра аваз районда тухвай мярекатрикай, халкьдин патай Эминаз авай кIанивиликай гегьеншдаказ рахана.
М.Мирзебегова Етим Эминан 180 йис тамам хьайи йисуз цIийидаказ “Етим Эмин” тамаша сегьнеда эциг хъувун театрдин коллективдин агалкьун тирди къейдна, алай вахтунда театрдин коллективди, Дагъустандин халкьдин шаир СтIал Сулейманан 150 йисан юбилейдиз гьазурвилер акун яз, ХХ асирдин Гомеракай тамаша сегьнеда эцигунал кIвалахзавайди хабар гана.
Сегьне артистрин ихтиярда гьатна. Тамашадин гьерекатар Етим Эмин яшамиш хьайи ва ада вичин жавагьирар яратмишай XIX асирдин юкьвара кьиле физва. Сегьнедилай тамашачийриз Етим Эмин (РФ-дин лайихлу ва РД-дин халкьдин артист Абдуллагь Гьабибов), Туькезбан (РД-дин халкьдин артистка Фаризат Зейналова), гьа девирдин алимар тир Хважа Мегьамед эфенди (РД-дин лайихлу артист Саидин Думаев), Алкьвадар Гьасан эфенди (РД-дин лайихлу артист Руслан Пирвердиев), Куьре округдин хан Юсуф (РД-дин лайихлу артист Ибрамхалил Рамазанов), Етим Эминан стха Мелик (артист Гьамзабег Эмиралиев), Етим Эминан гъвечIи руш Мислимат (Дербент шегьердин 21-нумрадин юкьван школадин 4-классдин ученица Марьям Загьирбегова), округда машгьур алим Услар (артист Казбек Думаев), хуьруьн кавха Фетягь (РД-дин лайихлу артист Агъахан Агъаханов) аквазва.
Гьа девирдин гьахъсузвилер, халкьдин залан уьмуьр, Етим Эминанни Туькезбанан михьи муьгьуьббат гьам режиссердилай, гьамни артистрилай устаддаказ къалуриз алакьна. Тамашадик хъуьруьн-зарафат квай шад сегьнеяр, халкьдин агьни-агьузар, Етим Эминан мурадарни рикIин хиялар къалурзавай маниярни гзаф квай. “Етим Эмин” тамаша райондин агьалийриз гзаф бегенмиш хьана.
Тамашачийри артистриз цуьквер багъишайдалай гуьгъуьниз, Лацис Оружева мугьман хьунай, фадлай халкьдин вил алай тамаша сегьнеда эциг хъувунай ва къалурунай райондин кьил Нариман Абдулмуталибован, районэгьлийрин тIварунихъай театрдин коллективдиз сагърай лагьана.
Хазран Кьасумов
