2018-йисуз Мегьарамдхуьруьн райондин зегьметчийри 44180 тонн емишар кIватI хъувуна. 2017-йисуз районда емишрин бегьерар 43250 тонндив агакьнай. Идани республикада гьасилзавай емишрин продукциядин кьудай са пай тешкилна.
Хуьруьн майишат вилик тухуниз Мегьарамдхуьруьн районда кьетIен фикир гузва. Алай вахтунда райондин хуьруьн майишатдин асул хилерик багъманчивал, уьзуьмчивал, майвачивал ва малдарвал акатзава. 2018-йисуз районда 86310 тонндилай виниз салан майваяр кIватI хъувуна. Ци-пицIрин бегьер лагьайтIа, 13611 тонндив агакьна.
Идалай гъейри, районда субтропикрин майваяр (инжирар, анарар, хурмаяр, кивияр ва мсб) гьасилзава.
Районда хуьруьн майишатдин метлеб авай майданар, санлай къачурла, 46499 гектардив агакьнава. 5910 гектардин майданар багълари кьунва. Идакайни 4857 гектардин багълар бегьердал атанвайбур я, жегьил багъларал 1053 гектардин майданар гьалтзава.
Муниципальный райондин кьил Фарид Агьмедова райондин хуьруьн майишат йигин еришралди вилик тухунин везифа вилик эцигнава.
Алай вахтунда райондин мулкарал, Чепелрин хуьруьн къерехда авай чилерал, лап интенсивный жуьредин алай аямдин багъ кутунин рекьяй инвестпроект кьилиз акъудзава. Районда хуьруьн майишатдин продукциядихъ галаз алакъалу оптово-распределительный центр арадал гъунин кIвалахар гъиле кьунва. Ам хуьруьн майишатдин продукция хуьнин, къапара тунин, маса гунин, дашмишунин барадай са жерге къуллугъар ийидай надир имарат я.
2018-йис квелди лишанлу хьана лагьайтIа, Мегьарамдхуьруьн районда гьасилнавай хуьруьн майишатдин продукция Россиядин базардиз акъудунин рекьер жагъурна. И кIвалах Мегьарамдхуьруьн районди Санкт-Петербургдихъ галаз кутIуннавай икьрардин бинедаллаз кьилиз акъудзава. Мегьарамдхуьруьн райондин продукция гьасилзавайбуру «Спектр» фирмадихъ галаз кутIуннавай икьрардин сергьятра аваз Москвадивни районда гьасилзавай хуьруьн майишатдин продукция агакьарзава.
Муниципалитетдин кьил Фарид Агьмедова райондин хуьруьн майишат вилик тухун патал къецепатан уьлквейрай инвесторарни желбнава. ИкI, Мегьарамдхуьруьн районда гьасилзавай хуьруьн майишатдин продукция Кувейтдин “Cyder Connect” компанияди маса къачуда. Районда гьасилзавай хуьруьн майишатдин продукциядихъ галаз таниш хьайидалай гуьгъуьниз ам гзаф ерилуди ва экологиядин жигьетдай михьиди тирдахъ инанмиш хьайи мугьманар а продукция маса къачунин икьрардал атана.
Чи мухбир
