ТIебиатда чаз гьатта ванни тахьай, телевизордайни такур гьайванар ава. Гьахьтинбурукай сад Мадагаскарда яшамиш жезвай фосса тIвар алай вагьши гьайван я. Винел патан акунрай гъвечIи пумадиз ухшар­ тирвиляй ам гзаф вахтара кацерикай яз гьисабзавай.

И вагьшидин бедендин яргъивилел 61-80 сантиметр, кьакьанвилел 37 сантиметр кьван жеда. Тумунин яргъивал саки бедендин яргъивилиз барабар я. Фосса тIиш гъвечIи, заланвал 7-12 килограмм кьван жедай гьайван я. Адет яз, и вагьшияр муьрхъуь рангунинбур, амма кьериз-цIаруз чIулавбурни жеда.

Фоссайри чпин магъараяр тамара туькIуьрда, амма тIуьн жагъурун патал абуру кул-кусар авай гегьенш чуьллерани гзаф вахтар акъудда. Гъуьрч авунин гьерекатар абуру гзафни-гзаф йифен, гагь-гагь хурушум вахтунда кьилиз акъудда. Недай суьрсет яз фоссайри нек хъвадай гъвечIи гьайванар, къушар, гьашаратар, чурчулар ва хур галчIурдай маса гьайванар ишлемишда. Бязи вахтара абуру Мадагаскарда бул тир лемуррални гьужумда. Пацарин ва тумунин куьмекдалди фосса тараризни регьятдиз акьахда. Адан сес кацин сесиниз ухшар я.

Гьазурайди — Куругъли Ферзалиев