“Сулейман-Стальский район” муниципальный райондин администрацияда Дагъустан Республикадин Кьилин ва Гьукуматдин Администрациядин Руководителдин заместитель Темерлан Шабанова РД вилик тухунин кар алай проектар районда уьмуьрдиз кечирмишзавай гьалдиз талукьранавай семинар-совещание кьиле тухвана.

Совещанидин кIвалахда муниципальный райондин кьил Нариман Абдулмуталибова, РД-дин Кьилин ва Гьукуматдин Администрациядин проектрин кIвалах тешкилунин отделдин начальник Мегьамед Абидова, РД-дин хуьруьн майишатдин ва суьрсетдин министерстводин малдарвилин гъвечIи карчивилин субъектар вилик тухунин отделдин начальник Ильмудин Салагьбегова, РД-дин Кьилин ва Гьукуматдин администрациядин проектрин кIвалах тешкилунин отделдин консультант Булат Арсланова, гьакIни райадминистрациядин кьилин заместителри, райондин идарайрин ва организацийрин руководителри, хуьрерин поселенийрин кьилери, общественностдин ва СМИ-рин векилри иштиракна.

Совещание ачухуналди, муниципальный райондин кьил Нариман Абдулмуталибова атанвай мугьманар тебрикна, кар алай проектар уьмуьрдиз кечирмишун яз районда тухузвай кIвалахдикай, ида райондин бюджетдиз алава къазанжияр гъизвайдакай, агьалийриз яшайишдин къулай шартIар ярат­миш­завайдакай лагьана.

Темерлан Шабанов вичин рахунра РД вилик тухунин кар алай проектар кьилиз акъудзавай гьалдал гегьеншдиз акъвазна.

— Кар алай проектар уьмуьрдиз кечирмишунин рекьяй республикада муниципальный теш­килатрин кIвалахдиз къимет гудай уьлчмеяр тайинарнава, — лагьана Темерлан Шабано­ва. — Вилик тухунин рекьер тайинардайла, экономика “лацуди” авуниз, инвестицийриз, менфятлу АПК-диз, кIвалахдин цIийи чкаяр тешки­луниз, халкьдин майишат еримлу авуни  кьилин фикир ганва. Гьа и кIвалахриз килигна исполнительный властдин, чкадин чпи чеб ида­ра ийидай  органрин кIвалахдиз къиметни гу­да. Кар алай проектрин куьмекдалди абурун­ кIва­­­лах­дал гьакъи­къи гуьзчивални тухуз жеда.

“Экономика лацуди авун” кар алай проект­ уьмуьрдиз кечирмишун патал районда ту­хуз­вай кIвалахдикай ва и карда гьалтзавай четин­вилерикай райадминистрациядин экономикадин отделдин начальник Саният Вагьабовади малумат гана. Ада къейд авурвал, кар­ алай и проектдай районда капитальный эци­гунрин объектар ва чилерин участокар ак­ту­а­лизиро­ватунин рекьяй тайин кIва­лах тух­ванва, регистрация тавуна кIвалахза­вай­бур тайинарнава, гьа са вахтунда Росреестр­дихъ ва Кадастровый палатадихъ галаз ала­къалу тир месэлайрай кIвалахда четинвилерни гьалтзава (абурал докладчи гегьеншдиз акъвазна).­

Гьалтзавай четинвилериз баян гун яз Темерлан Шабанова къейд авурвал, совещани­дал къарагъарай месэлаяр МФЦ-дихъ, хуьрерин поселенийрин кьилерихъ, налогрин ва къайдаяр хуьдай органрихъ галаз санал гьялиз жеда.

“Вилик фидай чкаяр, инвестицияр территорияр нетижалудаказ еримлу авун” кар алай проект уьмуьрдиз кечирмишзавай гьалдикай райондин администрациядин кьилин заместитель Саид Темирханов рахана. Ада лагьай­вал, районда промышленный майданар тешкилуниз ва абур лазим тир шейэралди таъминаруниз кьилин фикир гузва, ида инвесторриз чпин проектрал  къуватар желб ийиз куьмекзава; районда шей гьасилзавайбурукай делилар кIватIнава, абур ахтармишнава, суьрсетдин ва суьрсетдинбур тушир маса гудай затIар акъудзавайбурун Реестр тестикьарун патал кIвалах тухузва, муниципалитет социально-экономический рекьерай вилик тухун патал планламишнавай дережадив агакьарун патал тухудай серенжемар тайинарнава.

Райондин хуьруьн майишатдин ва суьрсетдин управленидин начальник Мегьамедзагьид Бабаев вичин рахунра “Нетижалу АПК” кар алай проект уьмуьрдиз кечирмишунин рекьяй тухузвай кIвалахдал гегьеншдиз акъвазна. Ада лагьайвал, и проектдин сергьятра аваз районда еке кIвалах тухванва, ида хъсанвилихъ еке дегишвилерни арадал гъанва. Хуьруьн майишатдин кар алай хилер кIвачел ахкьалдарунин мураддалди районда яргъал йисарин программа кьабулнава. Инвестиционный проектар кардик акатун себеб яз районда эхиримжи 5 йисан къене 813,3 гектарда уьзуьмлухар, 539,5 гектарда багълар кутуна, грантар къачурбуру 196 къарамал, 2080 лапаг хуьдай дараматар, 8,85 гектарда теплицаяр эцигна. Районда емишрин, салан майвайрин, техилдин, ци­пицI­рин бегьерар йисалай-суз артух жезва. “Паласа” ООО-да вичин сметадин къимет са­ки 400 миллион манат тир 250 гектарда интенсивный багълар кутунин инвестиционный проект кьилиз акъудунив эгечIнава.

Совещанидал районда “ЦIийи индустрилизация”, “Государстводи нетижалудаказ идара авун”, “Инсанвилин капитал”, “Да­гъус­танда къанун-къайда ва хатасузвал” кар алай проектар уьмуьрдиз кечирмишун патал тухузвай кIвалахрикайни рахунар авуна­.

— РД-дин Кьилин кар алай проектар уьмуьр­диз кечирмишунин рекьерай районда тухузвай кIвалахдал чун рази яз амукьна, — къейд­на­ Темерлан Шабанова. — Ида муници­па­­литетдихъ еке мумкинвилер авайди къа­лур­зава­.

Семинар-совещанидилай гуьгъуьниз муниципальный райондин кьил Нариман Аб­дулмуталибова багьа мугьманар 15 гектарда­ ин­тенсивный къайдадин багълар кутунвай “Члар” карханадин инвестиционный проектдихъ галаз танишарна.

Хазран Кьасумов