И йикъара Кьасумхуьрел, “Комсомол и развитие молодежных объединений в нашей стране. Без прошлого нет будущего” темадай жегьилрин илимдинни тежрибадин конференция кьиле тухвана.

Адан кIвалахда райондин администрациядин кьилин 1-заместитель Лацис Оружева, общественный палатадин председатель Алимет Мейланова, РФ-дин компартиядин райондин комитетдин 1-секретарь Валентин Ханбалаева, образованидин управленидин начальник Къачабег Аминова, “Надежда России” тIвар алай Россиядин дишегьлийрин Союздин региональный отделенидин руководитель Александра Хорошевскаяди иштиракна.

Комсомолдихъ, жегьилрин организацийрихъ, абурун гележегдихъ галаз алакъалу жуьреба-жуьре месэлайрай докладар гваз Герейханован 1-нумрадин юкьван школадин муаллим-психолог Раиса Ламетова, Жегьилрин парламентдин куратор Мегьамед Алиев, диде-бубайрин комитетдин председатель Эльза Рустамова, Курхуьруьн 2-нумрадин юкьван школадин директордин заместитель Лейла Уружбегова, Испикрин юкьван школадин урус чIаланни литературадин муаллим Маина Мирзамегьамедова, ЦIийи поселокдин юкьван школадин 9-классдин ученик Рагьим Селягьов, Вини СтIалрин юкьван школадин 10-классдин ученица Эльвина Алиева, жегьилрин парламентдин член Нажмудин Бабаев, Алкьвадрин юкьван школадин тарихдин ва обществознанидин муаллим Айдин Рагьимханов майдандиз экъечIна.

Эхирдай активистрив ВЛКСМ-дин 100 йисан юбилейдихъ галаз алакъалу яз КПРФ-дин гьуьрметдин знакар, ЛКСМ-дин ва “Дети войны” тIвар алай Вирироссиядин общественный организациядин гьуьрметдин грамотаяр вахкана.

Конференциядилай гуьгъуьниз Сулейман-Стальский районда комсомолрин организация тешкил хъувуниз талукьарнавай собрание кьиле фена. Анал 9 касдикай ибарат яз райкомдин состав, бюродин ирид член хкяна. 27 жегьилдив комсомолдин билетар вахкана.

Районда цIийиз арадал хканвай комсомол организациядин 1-секретарвиле Нажмудин Бабаев, 2-секретарвиле Суьлгьия Рамазанова хкяна.

Хазран Кьасумов