Дербент шегьерда къецепатан уьлквейрани машгьур Россиядин “Proline Film” тlвар алай кинокомпанияди “Пальмира” тlвар алаз чIехи художественный фильм лентиниз къачузва. Кинодин продюсер “Proline Film” киностудиядин бине кутур Андрей Сигле, сценарийдин автор Константин Лопушанский ва соавтор Иван Болотников – международный са шумуд кинофестивалрин шабагьрин иесияр я. И проект арадал атун патал РФ-дин культурадин министерстводи къуьн кутунва.

Кинофильмдин пресс — къуллугъдин векил Аннадин гафарай малум хьайивал, кино Унцукул райондин Кахабросо хуьре лентиниз къачуз гатlунна. Алай вахтунда кинооператорди  Дербент шегьердин магьалда авай рагъэкъечlдай патан итимрин куьгьне гьамамра кIвалахзава, ахпа Буйнакский куьчеда авай Пассажда давамардайвал я. Фильмдин са пай  Санкт-Петербургда, Туьркияда  ва  Сирияда лентиниз къачуда.

Кинодин вакъиайрин бинеда Дагъустандин са хуьряй тир,  паб кьенвай духтур Артуран уьмуьр ава.  Бейхабардиз адаз вичин руш, Сириядиз фена, ИГИЛ-дик экечlнавайди чир жезва. И хабарди адан зегьле ракъурзава. Вич-вичел хтайла, ам кьилел  вуч  къведатlа, гьадакай фикир тавуна, руш къутармишиз рекье гьатзава.

Режиссер ва сценарийдин соавтор Иван Болотникован гафаралди, сценарийдин бинеда ИГИЛ-дин террористический дестедик экечlиз Сириядиз вичин пуд аялни галаз фейи дагъвидин папан хизандин кьисмет ава.

Киностудиядин векилди журналистриз кино лентиниз къачузвай эпизодриз килигдай мумкинвални, шикилар ядай ихтиярни гана.

Кинода кьилин роль къугъвазвай Венгриядай тир актер Гезы Морчанидин фикирдалди,  кинодин игит  гужлу инсан я. Адаз и рекье вичин кьилел вуч къведатlа, вич амукьдатlани чин тийиз,  аялрин саламатвал патал акьалтlай дирибашвал къалурзава.

Кинода гьакl актерар Даниэла Стояновича,  Екатерина Крамаренкоди,  Дариус Гумаускаса  ва масабуру иштиракзава.

Фильм тамашачийриз 2019-йисуз къалурдайвал я.

Къагьриман Ибрагьимов