Сардархуьруьн спортдин комплексда, самбодайни дзюдодай са шумуд сеферра дуьньядин чемпион, спортдин лайихлу мастер Газимегьамед Агьмедов рикIел хкуниз талукьарна, 2002-2004-йисара дидедиз хьайи жаванрин арада дзюдодай республикадин кьвед лагьай турнир кьиле фена. Гьуьрметлу мугьманар яз, турнир ачухунин мярекатда Сулейман-Стальский, Агъул, Кьурагь районрин кьилери — Нариман Абдулмуталибова, Юрий Гьуьсейнова, Замир Азизова, пешекаррин арада дуьньядин чемпионар тир Галип Галипова, Мегьамед Исаева, спортдин международный классдин мастер Руслан Гьамзатова, СССР-дин чемпион, Европадин Кубокдин сагьиб, Дагъустан Республикадин хкянавай командадин кьилин тренер Шамил Алиева, СССР-дин спортдин мастер, Дербент райондин Чинар хуьруьн администрациядин кьил Азад Герейханова, Гуниб райондин Кегер хуьруьн обществодин председатель Камил Саидова иштиракна.
Мярекатдал Нариман Абдулмуталибова ихьтин турниррихъ республикадин спортсменрин арада дуствилин алакъаяр мягькемарунин, жаван спортсменрин устадвал хкажунин жигьетдай еке метлеб авайди къейдна.
— Къе чна машгьур дагъустанви, самбодайни дзюдодай 23 сеферда дуьньядин чемпионвилин тIвар къачур, Дагъустан яргъарани машгьур авур цIудралди пагьливанар тербияламишай Газимегьамед Агьмедов рикIел хкунин турнир тухузва. Са рахунни алачиз, ватанпересвилин жигьетдай ам къенин жегьилриз чешне я. Ихьтин турнирри адан кар давамардай машгьур спортсменарни майдандиз акъудда, — лагьана ада.
Мярекатдал Юрий Гьуьсейнов, Замир Азизов, Азад Герейханов, Галип Галипов, Мегьамед Исаев, Камил Саидов, Дагъустан Республикадин судьяйрин коллегиядин председатель Мегьамедзагьид Мегьамедов, райондин самбодинни дзюдодин ДЮСШ-дин директор, дзюдодай пешекаррин арада дуьньядин чемпион Тельман Къурбановни рахана, Газимегьамед Агьмедован экуь къамат, лайихлувилер рикIел хкана.
Сардархуьре кардик квай аялрин “Аманат” бахчадин бицIекри, Кьулан СтIалрин ва Сардархуьруьн юкьван школайра кIелзавай аялри тамамарай кьуьлери турнирдин иштиракчийрин ва мугьманрин гуьгьуьлар мадни хкажна.
Гуьгъуьнлай Дагъустандин шегьеррайни районрай атанвай 150-далай виниз жаван спортсменри чпин устадвал къалурна.
Къизгъиндаказ кьиле фейи акъажунра спортсменар тир Сагьиб Марданова (Дербент), Къурбан Валиева (Махачкъала), Фаик Агьмедова (Дербент), Абдулагь Мегьамедова, Гьажи Исмаилова (Махачкъала), Альберт Рамазанова (Сулейман-Стальский район) 1-чкаяр кьуна.
Турнирда 1, 2 ва 3-чкайриз лайихлу хьайи спортсменриз медалар, кубокар, грамотаяр гана.
Махсус призриз турнирдиз къуллугъ авур судьяяр, гьакIни хъсан техника ва гъалибвилихъ къаст къалурай кьилдин спортсменарни лайихлу хьана.
Хазран Кьасумов
