Ислам динда Мугьаммад пайгъамбар (с.а.с.) хайи югъ мусурманрин календардин 3-вацран (Раби-уль-аввал, 570-йисан 26-апрель) 12-юкъуз къейдзава (цIи 21-ноябрдал ацалтна). И юкъуз Ам рагьметдизни фена. Им дуьшуьшдин ацалтун туш, гьикI хьи, Ислам динда, инсан дидедиз хайи йикъалай тафаватлу яз, ам кьейи югъ шад вакъиа хьиз гьисабзава. Гуя и юкъуз ам михьи дуьньядин эбеди уьмуьрдиз физва…

28-ноябрдиз Ахцегьрин жуьмя-мискIиндани мавлид кьиле тухвана. Мярекатда районэгьлийри, Дербентдин диндин чирвилерин Бабуль-Абваб центрадин ва мискIиндин алимри, Кьиблепатан Дагъустандин районрин ва хуьрерин имамри, теклифнавай маса ксари иштиракна.

Мавлид райондин имамрин советдин председатель, жуьмя-мискIиндин имам Гьажи Абдулашим  Абдулгьашумова районэгьлияр ва мугьманар тебрикунилай, гьакI диндин Бабуль-Абваб университетдин ректор алим Ариф гьажиди пак Къуръандин аятар кIелунилай башламишна.

Сифте гаф Дербент шегьердин жуьмя-мискIиндин имам, шейх Исамудин эфенди рахана. Са куьруь вахтунда Мугьаммад пайгъамбардилай (с.а.с.) вичин къени къилихралдини краралди ва таъсирлу суьгьбетралди инсанар дуьз рекьел — Ислам диндал гъиз алакьайди къейдна. Ада итижлу хейлин гьадисарни мисалар гъана.

Мавлиддин дуьайринни назмайрин арайра Ахцегь райондин кьилин заместитель Роберт Гьамзаева, алимри, имамри Мугьаммад пайгъамбардин (с.а.с.) пак тIварцIел атанвай жемятдиз межлис мубаракна.

Мавлид нисинин кпIунилай кьулухъ мискIинда берекатлу суфрайрихъ давам хьана. Аллагьди кьабулрай!

Дашдемир Шерифалиев